Azərbaycan, Bakı, 28 mart /Trend, müxbir H.Vəliyev/
İlin sonunadək "Tələbə-məzun" dövlət elektron məlumat sisteminə Azərbaycanın ali məktəblərində təhsil alan tələbələrin akademik nəticələri haqqında məlumatlar daxil ediləcək. Trend-in məlumatına görə, bu barədə çərşənbə günü Tələbə Qəbulu üzrə Dövlət Komissiyasının (TQDK) sədri Məleykə Abbaszadə sistemin təqdimatında bildirib.
Onun sözlərinə görə, layihə bakalavrın dörd il ərzində ali təhsil aldığı dövrdə akademik nəticələri haqqında informasiyanın sistemin məlumat bazasına daxil edilməsini nəzərdə tutur.
Hazırda sistemdə tələbələr, imtahan nəticələri və onların diplom almaları haqqında məlumat yer alıb.
"Sistemin informasiya tərkibi vaxtaşırı artırılacaq. Nəzərə almaq lazımdır ki, bu gün Azərbaycanın bütün ali məktəbləri Boloniya sisteminə qoşulub. Bu sistemin xüsusiyyətlərindən biri odur ki, o, tələbələrin mobilliyini təmin edir. Yəni onlara akademik kredit almaq üçün öz ali məktəbindən digərinə və geriyə keçməyə imkan verir. Bu mobillik respublikanın daxilində universitetlər arasında təmin edilməlidir. Onun təmin edilməsi üçün ali məktəblər təhsil alanlar haqqında dəqiq məlumata malik olmalıdırlar", - Abbaszadə qeyd edib.
Sistem şəxsi məlumatın tam müdafiəsini təmin etmək məqsədilə Azərbaycan Rabitə və İnformasiya Texnologiyları Nazirliyinin ekspertizasından keçib.
Perspektivdə servisin yaradılması nəzərdə tutulub. Servis vətəndaşlara elektron imzadan və şəxsiyyət vəsiqəsi üzrə məlumatlardan istifadə etməklə öz şəxsi məlumatlarına çıxış imkanı verəcək.
"Tələbə-məzun" sisteminin yaradlması zamanı TQDK-nın irəli sürdüyü tələblər istifadəçilər üçün təhlükəsizliyin, sabitliyin və rahatlığın yaradılması olub.
Sistemin texniki hissəsi klaster əsasında qurulub. İnternet informasiya serveri (Internet Information Server) ikiklasterli əsasda qurulub, serverlərdən biri sıradan çıxacağı təqdirdə, məlumatların kompleks müdafiəsi və qəzanın bərpası (Disaster Recovery) onun işinin stabilliyini təmin edir.
Sistemin sabit işini "Microsoft" şirkətindən sertifikat serveri (Certificate Authority) də təmin edir. Bu server də klaster əsasında qurulub.
Sistemə çıxışı (WEB vasitəsilə) sertifikat vasitəsilə əldə etmək olar ki, bu da onun təhlükəsizliyini təmin edir.