Azərbaycan, Bakı, 22 may /Trend, müxbir H.Vəliyev/
Hərbi xidmətdən möhlət hüququ üzrə informasiya bazasının olması ali məktəblərə daxil olmaq üçün sənədlərin verilməsində ərizələrin təsdiqi məsələsini sadələşdirəcək. Bu barədə Trend-ə Tələbə Qəbulu üzrə Dövlət Komissiyasının (TQDK) sədri Məleykə Abbaszadə deyib.
Abbaszadənin sözlərinə görə, hərbi xidmətdən möhlət hüququ almış vətəndaşlar haqqında informasiya mütəmadi olaraq dəyişir və bu prosesin avtomatlaşdırılması möhlət haqqında sənədin mövcudluğuna, həmçinin sənədin nə vaxt və nə qədər müddətə verilməsinə dair məlumatı operativ əldə etməyə imkan verəcək.
Komissiya sədri qeyd edib ki, yeni sistem möhlət haqqında sənədin notarial qaydada təsdiqini nəzərdə tutmur: "Vətəndaşı bu bazada eyniləşdirmək üçün şəxsiyyət vəsiqəsini təqdim etmək kifayət edəcək. Bizin Daxili İşlər Nazirliyinin məlumat bazası vasitəsilə şəxsiyyət vəsiqəsi üzrə abituriyentin şəxsiyyətini eyniləşdirmək imkanımız var. Hazırda təqribən 68 min nəfər artıq öz ərizəsini verib. Bizim attestatlar barədə bazamız var ki, bu da onların cari ildə həqiqətən də məktəb məzunları olduqlarını təsdiq edir".
Abbaszadənin sözlərinə görə, digər vacib məsələ Azərbaycanın ali məkəblərində təhsil almaq istəyən xarici vətəndaşların sənədlərinin qəbulu ilə bağlıdır.
TQDK sədri hesab edir ki, bu vətəndaşlar sənədlərini verərkən müəyyən çətinliklərlə üzləşirlər ki, bu da daimi yaşayış yeri üzrə vəsiqələrə dair informasiyanı əks etdirən məlumat bazasının olmaması ilə bağlıdır.
