Azərbaycan, Bakı, 28 oktyabr /Trend, müxbir H.Vəliyev/
Azərbaycanın poçt rabitəsi operatoru - "Azərpoçt" MMC rebrendinqə başlayır. Bu barədə Trend-ə MMC-dən bildirilib.
Trend-ə MMC-dən bildiriblər ki, operatorun rebrendinqi üzrə işləri Niderlandın "Guidion" şirkəti görəcək. Həmin şirkətlə yaxın günlərdə müqavilə imzalanacaq. Rebrendinq üzrə işlər sənədin imzalanmasından sonra 10 gün ərzində başlayacaq.
"Guidion"un işi poçt operatoru üçün marketinq strategiyasını hazırlamaq, o cümlədən onun yeni maliyyə məhsullarında tələbatlarını qiymətləndirməkdir.
Qarşıya qoyulan məqsədlərə nail olunmaq üçün 130 min dollar vəsait xərclənəcək. Məbləğ qrant şəklində İsveçrənin İqtisadi məsələlər üzrə Dövlət Katibliyi (State Secretariat for Economic Affairs - SECO) tərəfindən ayrılıb.