Azərbaycan, Bakı, 18 noyabr /Trend, müxbir H.Vəliyev/
Azərbaycan informasiya-kommunikasiya texnologiyaları (İKT) sahəsində öz elmi işlərini Avropada keçirilən tenderlərə çıxarmağa hazırlaşır. Bu barədə bazar ertəsi Trend-ə Regional İnformasiya Texnologiyaları Akademiyasının (RİTA - Regional Information Technologies Academy) direktoru Tofiq Babayev bildirib.
T.Babayevin sözlərinə görə, bu gün başlıca vəzifə Avropa şirkətləri ilə konsorsiumun yaradılması, yeni "Horizon 2020" (2014-2020 illər) proqramı çərçivəsində Azərbaycan alimlərinin layihələrinin tədqiqatların və innovasiyaların maliyyələşdirilməsi üzrə Avropa İttifaqının tenderlərində iştirak hüququ almasıdır:
"Noyabrın birinci ongünlüyünün sonunda Litvada "IC-2013" sərgi-konfransı keçirilib. Bu konfrans iki ildən bir Avropa Komissiyası tərəfindən təşkil olunur və texnologiyaların inkişafı və elmi tədqiqatlar üzrə çərçivə proqramlarına həsr olunur. Azərbaycan bu tədbirdə İKT sahəsində 15 elmi tədqiqat layihəsi təqdim edib. Onlar arasında Kibernetika İnstitutunun, Dövlət Sosial Müdafiə Fondunun Elmi Tədqiqat və Tədris Mərkəzinin, Milli Aerokosmik Agentliyin və Dövlət İqtisad Universitetinin layihələri yer alıb".
Həmçinin, mobil telefon vasitəsilə ürək-damar sisteminin monitorinqi üzrə intellektual-informasiya sisteminin monitorinqinin hazırlanması və toksiki maddələrlə zəhərlənmənin diaqnostikası, əsas neft və qaz kəmərlərinin çəkilişi üçün optimal yolların seçimi və vəziyyətinə nəzarət və digər layihələr təqdim edilib.
Tenderlər iqlim dəyişiklikləri, bərpa olunan enerjidən istifadə, qida məhsullarının təhlükəsizliyinin təmin olunması və s. kimi prioritet istiqamətlər üzrə keçiriləcək.
Tenderin keçirilmə qrafiki noyabrın sonu, dekabrın əvvəllərində məlum olacaq. Birinci tenderin dekabrın 11-də keçiriləcəyi gözlənilir.
Avropa Komissiyasının elmi tədqiqat mərkəzləri ilə birgə konsorsiumun yaradılması məqsədilə bu gün 40-a yaxın görüş keçirilib. Artıq 10 Avropa strukturu ilə ilkin razılaşma əldə olunub.
T.Babayev deyib: "Biz ümid edirik ki, Azərbaycanın layihələri avropalı alimləri maraqlandıracaq və "Horizon 2020" proqramı Avropa Komissiyasının maliyyə dəstəyi ilə ikitərəfli tədqiqatların keçirilməsinə yardım edəcək".
