Azərbaycan, Bakı, 18 fevral /Trend, müxbir H.Vəliyev/
Azərbaycanın poçt operatoru "Azərpoçt" MMC-nin rebrendinqi üzrə pilot layihəyə 2014-cü ilin ortalarında Şirvan şəhərinin 7 poçt şöbəsində başlanılması gözlənilir. Bunu çərşənbə axşamı Trend-ə MMC-dən deyiblər.
Layihəni Niderlandın "Guidion" şirkəti həyata keçirəcək. Şirkət Azərbaycanın poçt operatorunun yeni imicinin formalaşdırılması ilə bağlı daha əvvəl elan edilmiş maraqlar sorğusunun qalibi olub.
MMC-dən deyiblər ki, şirkət "Azərpoçt"un Azərbaycan bazarında marketinq mövqeyini araşdırmağa başlayıb. Aparılan sorğu əsasında poçt operatorunun əhaliyə göstərdiyi ənənəvi poçt və maliyyə xidmətlərinin keyfiyyəti öyrənilir.
Rebrendinq proqramı üzrə işlər mərhələli olaraq həyata keçiriləcək və 2015-ci ilin fevralında başa çatacaq.
"Guidion"un vəzifəsi poçt operatorunun marketinq strategiyasını hazırlamaq, onun yeni maliyyə məhsullarına olan ehtiyacını qiymətləndirməkdir. Əsas məqsəd marketinq və satışlar üzrə strategiyanın əsas tərkib hissəsi kimi poçt operatorunun yeni brend strategiyasının müəyyənləşdirilməsinə dəstək verməkdir. Bununla əlaqədar olaraq bazar araşdırmaları və planlaşdırma, kommunikasiya və media-planlaşdırma sahələrində MMC-nin potensialının gücləndirilməsi nəzərdə tutulur.
Bu məqsədlər üçün İsveçrənin İqtisadi Məsələr üzrə Dövlət Katibliyinin (State Secretariat for Economic Affairs - SECO) qrant vəsaitindən 130 min dollar xərclənəcək.
