Azərbaycan, Bakı, 29 aprel /Trend, müxbir H.Vəliyev/
Azərbaycan Maliyyə Nazirliyi "startap" layihələrini dəstəkləmək üçün İnformasiya Texnologiyalarının İnkişafı Dövlət Fonduna əlavə maliyyə vəsaiti ayırmağa hazırdır. Bunu Trend-ə Azərbaycanın telekommunikasiya bazarındakı mənbə deyib.
Mənbənin sözlərinə görə, nazirlik cari ildə layihələrin maliyyələşdirilməsi üçün nəzərdə tutulmuş vəsaitlərin səmərəli bölüşdürülməsi nəzərə alınmaqla əlavə 5 milyon manat ayırmağa hazırdır.
Mənbə bildirib ki, sahibkarlar yaxın vaxtlarda Dövlət Fonduna "Elektron hökumət" (e-gov.az) portalının köməyi ilə müraciət edə bilərlər: "Fonda müraciət proseduru tam avtomatlaşdırılıb və xidmət Rabitə və Yüksək Texnologiyalar Nazirliyinin elektron xidmətlər siyahısına daxil ediləcək".
Qeyd edək ki, 2014-cü ildə dövlət büdcəsindən qeyd edilən məqsədlərə 5 milyon manat ayrılıb. 2,5 milyon manat həcmində ilkin tranş Dövlət Fonduna təqdim edilib. 2,5 milyon manat həcmində ikinci tranşın ayrılması isə mayda gözlənilir.