Azərbaycan, Bakı, 4 iyul /Trend, müxbir Hüseyn Vəliyev/
Azərbaycan Rabitə və Yüksək Texnologiyaları Nazirliyinin İnformasiya Texnologiyalarının İnkişafı Dövlət Fondu qrant maliyyələşdirilməsinin verilməsi üçün startap-layihələr müsabiqəsinə yekun vurub. Bu barədə Trend-ə Fondun icraçı direktoru Elçin Zeynalov deyib.
Müsabiqədə iştirak üçün sənəd qəbulu 2014-cü il aprelin 2-dən mayın 2-dək davam edib. Göstərilən dövrdə Dövlət Fonduna 194 layihə təqdim edilib.
Layihələr bundan əvvəl Dövlət Fondunun Müşahidə Şurasının meyarlarına uyğun təsdiqlənmiş ekspert qrupları tərəfindən qiymətləndiriləcək.
E.Zeynalov qeyd edib ki, təqdim olunmuş 194 layihədən 59-u Müşahidə Şurası tərəfindən seçilib: "Şuranın iyulun 7-də keçiriləcək iclasında yekun müzakirələr aparılacaq və təsdiqlənmiş layihələrin inkişafı üçün qrantların verilməsi haqqında qərar qəbul olunacaq".
Dövlət Fonduna təqdim olunmuş layihələr aşağıdakı prioritet parametrlərə görə qiymətləndirilib: proqressiv proqram və innovativ İKT məhsullarının işlənib hazırlanması, innovativ texnologiyaların və infrastrukturun inkişafı, həmçinin onların kommersiyalaşdırılması, müasir texnologiyalar əsasında informasiya şəbəkələrinin yaradılması, İT və internet xidmətlərinin genişləndirilməsi.
Qrantın maksimal məbləği 300 min manat təşkil edə bilər (3 il müddətinə). Kiçik qrantlar isə 10-100 min, orta qrantlar 100-200 min, iri qrantlar isə 200-300 min manat məbləğində nəzərdə tutulub.
İki il ərzində həyata keçirilməsi nəzərdə tutulan kiçik və orta layihələr 3 mərhələdə maliyyələşdiriləcək. Birinci mərhələdə layihələr ümumi dəyərin 30 faizini, ikinci mərhələdə 40, üçüncü mərhələdə isə (son hesabatın təqdimatından sonra) məbləğin qalan 30 faizini alacaqlar.
Qeyd edək ki, İnformasiya Texnologiyalarının İnkişafı Dövlət Fondu Azərbaycan Prezidentinin 15 mart 2012-ci il tarixli sərəncamı əsasında yaradılıb. Fondun əsas vəzifəsi elmi-texniki sahədə kiçik müəssisələrin dəstəklənməsi və inkişafı, onlara birbaşa maliyyə dəstəyinin göstərilməsi, kadrların hazırlanması üzrə dövlət siyasətinin aparılmasıdır ki, bu da öz növbəsində ölkədə yeni iş yerlərinin yaradılmasına kömək edəcək.
