Azərbaycan, Bakı, 24 sentyabr /Trend, müxbir Hüseyn Vəliyev/
Azərbaycanda "start-up" layihələrinin maliyyələşdirilməsinə cəlb edilmiş müvəkkil kredit təşkilatlarının siyahısı daha üç bankla genişlənə bilər. Bu barədə Trend-ə Azərbaycanın telekommunikasiya bazarındakı mənbə bildirib.
Hazırda Paşa Bank, Bank Respublika, Dəmir Bank, Rabitəbank və Bank BTB "start-up" layihələrinin maliyyələşdirilməsi üzrə İnformasiya Texnologiyalarının İnkişafı Dövlət Fondunun müvəkkil agentləridirlər.
Agentliyin müsahibinin sözlərinə görə, hazırda daha 3 bankla danışıqlar aparılır. Bu bankların adları onlarla razılaşma əldə olunduqdan sonra açıqlanacaq.
"Start-up" layihələrinin kredit maliyyələşdirilməsi İnformasiya Texnologiyalarının İnkişafı Dövlət Fonduna ayrılan büdcə vəsaitləri hesabına həyata keçiriləcək.
2014-cü ildə "start-up" layihələrinin dəstəklənməsinə beş milyon manat vəsait ayrılıb.
