Azercell Telecom BM Rabitə və İnformasiya Texnologiyaları Nazirliyinin üçüncü nəsil rabitə xidməti (3G), xüsusilə WCDMA-nın tədbiqi ilə bağlı son qərarı gözləyir. Bu barədə şirkətin rəhbəri Halim Atəş bildirib.
Onun sözlərinə görə, şirkət yeni xidmətin tədbiqilə bağlı təkliflərini nazirliyə təqdim edib.
Şirkətin rəhbəri deyib ki, işləri bir neçə mərhələdə həyata keçirmək planlaşdırılır. İnvestisiyalar təxminən $100 mln. həcmində qiymətləndirilir. "Bu, genişləndirilmiş layihə olacaq, çünki həmin xidmətlərin tədbiqi üçün ölkədə yeni şəbəkə yaradılmalıdır" - deyə o vurğulayıb.
İlkin olaraq xidmətləri Bakıda və digər rayonlarda tədbiq etmək nəzərdə tutulub. Bu plan baş tutarsa, Azərbaycan MDB ölkələri arasında yeni texnologiyadan istifadə edən birinci dövlət olacaq.
WCDMA (Wideband Code Division Multiple Access - genişzolaqlı CDMA) standartı 3G texnologiyasının tədbiqilə əlaqədar genişzolaqlı radioçıxışın təminatı üçün nəzərdə tutulub. Bu standartın sürəti (qısa məsafələrdə təxminən 2 Mbit/s və uzun məsafələrdə 384 kbit/s) multimedia məlumatlarının ötülürməsini təmin edəcək. Həmin texnologiya GSM və PDC sistemlərinə uyğundur.
