Azərbaycan Dövlət Əmlakının İdarə olunması üzrə Dövlət Komitəsi Rabitə və İnformasiya Texnologiyaları Nazirliyinin birgə müəssisələrini özəlləşdirmək məqsədi ilə onların nizamnamə kapitalında dövlət payının qiymətləndirilməsi üçün məsləhətçi seçimi üzrə tenderi açıq elan edib.
Trend Dövlət Komitəsinə istinadən xəbər verir ki, tenderdə iştirak etmək istəyən şəxslərin sənədləri noyabrın 29-dək, təkliflər - dekabrın 7-nə qədər qəbul olunacaq. Tender təklifləri paketi dekabrın 8-də açılacaq.
Tenderin predmeti rabitə müəssisələrinin qiymətləndirilməsi və onların özəlləşdirilməsi üzrə texniki, maliyyə və hüquqi məsləhətləşmələrdən ibarətdir. Məsləhətləşmələrin birinci hissəsində müəssisələrin inventarlaşdırılması və beynəlxalq standartlar və normalar üzrə qiymətləndirmə, özəlləşdirmə üzrə çərçivə təkliflərinin hazırlanması, ikinci hissədə isə investorların cəlb olunması, informasiya memorandumunun hazırlanması, özəlləşdirmə sənədlərinin hazırlanması nəzərdə tutulub.
Təkliflər qiymətləndirilərkən iddiaçının bu cür işləri görmə təcrübəsi, fəaliyyət planı və iş metodu nəzərə alınacaq. Tenderdə iştirakın qiyməti 5 min AZN-dir.