"Elektron hökumət"in yaradılması çərçivəsində fəaliyyət proqramı üzrə ilkin sənədlər hazırlanıb. Bu barədə AR Prezidentinin İcra Aparatının informasiya resursları və texnologiyaları şöbəsinin müdiri Elmir Vəlizadə məlumat verib.
Trend in xəbər verdiyi kimi, onun sözlərinə görə, sənədlər 2005-2008-ci illərdə Azərbaycanda rabitə və informasiya texnologiyaları üzrə dövlət proqramının (Elektron Azərbaycan) icrası üçün yaradılmış Koordinasiya Şurası yanında fəaliyyət göstərən işçi qrupu tərəfindən hazırlanıb.
Sənəd həm biznes strukturlar, həm də dövlət institutları və vətəndaş cəmiyyəti üçün mühümdür. İlkin layihə Rabitə Nazirliyinin portalında müzakirəyə çıxarılıb.
"İlk növbədə ilkin layihələr gerçəkləşdiriləcək. Daha sonra isə yeni əlavə layihələrin həyata keçirilməsi üçün düzəliş və əlavələr ediləcək", - deyə o vurğulayıb.
Elmir Vəlizadə onu da bildirib ki, hazırda Azərbaycan İT sahəsinin 5 pilləli inkişaf göstəricisinə görə artıq 3 pilləni keçib.