Azərbaycanda təhsil sahəsində informasiya - kommunikasiya texnologiyalarının tətbiqinə həsr olunmuş milli seminar keçiriləcək. Azərbaycanın Rabitə və İnformasiya Texnologiyaları Nazirliyinə istinadən Trend məlumat verir ki, seminar 2007-ci ilin noyabrında 6 dövləti - Azərbaycan, Qazaxıstan, Qırğızıstan, Monqolustan, Tacikistan və Özbəkistanı əhatə edən "Ümumtəhsil sahəsində İKT" layihəsi çərçivəsində keçiriləcək.
Layihənin əsas məqsədi adıçəkilən ölkələrin təhsil sahəlrində informasiya-kommunikasiya texnologiyalarının istifadəsinin vəziyyəti və mövcud problemlərin müəyyən edilib aradan qaldırılmasıdır.
Qeyd edək ki, yanvarın sonunda layihə çərçivəsində Qırğızıstanda Asiya İnkişaf Bankının (AİB) maliyyə yardımı layihəsi çərçivəsində ilk regional seminar keçirilib. Həmin seminarda Azərbaycanın rabitə, təhsil nazirliyinin nümayəndə heyəti, AzNET layihəsi, həmçinin layihənin Azərbaycandakı milli koordinatorları da iştirak edib.
Layihə çərçivəsində müxtəlif dövlətlər üzrə layihə koordinatorları AİB-nin koordinatorlarına öz tədqiqatlarının nəticələri barədə məlumat təqdim edib.
Azərbaycan seminarda 2 tədqiqat işi ilə təmsil olunub: "İnternet imkanları və qoşulma problemləri" və "Dövlət və özəl sektor: əməkdaşlıq və özəl sektorun rolu". Bu tədqiqatlara ölkədə İKT infrastukturunun indiki vəziyyəti barədə məlumatlar, İKT-nin ümumtəhsil müəssisələrində tətbiqi, həyata keçirilmiş layihələr haqqında məlumat, strateji məqsədlər, problemlər və onların həlli yolları daxildir.
Məhz seminar çərçivəsində növbəti analoji tədbirin layihə iştirakçıları-dövlətlərinin birində keçirilməsi qərarı qəbul olunub. Bu məsələdə son söz AİB-yə məxsusdur.
Layihənin nəticələri İKT-nin ümumtəhsil müəssisələrində tətbiqinin yaxşılaşdırılması üçün təkliflər paketi halında hökumətə təqdim olunub.