Azərbaycan, Bakı/ Trend müxbir S.Babayeva/ Yanvar-may aylarında Azərbaycanın Rabitə və İnformasya Texnologiyaları Nazirliyi təqribən 24 min ailəni telefonla təmin edib. Bu barədə çərşənbə günü Nazirlikdən məlumat verilib.
Bu dövr ərzində istismara verilmiş telefon nömrələrinin ümumi sayı 23742 ədəd təşkil edib. Onlardan 9712 nömrə Baktelekom İB, qalan 14030 nömrə isə "Aztelekom"un payına düşüb.
2006-cı ildə Rabitə Nazirliyi 280594 nömrə istismara verib ki, bu da 2005-ci illə müqayisəıdə 116409 ədəd çoxdur.
"Aztelekom" İB Naxçıvan Muxtar Respublikası istisna olmaqla bütün ölkə ərazisində şəhərlərarası və beynəlxalq telefon rabitəsini həyata keçirir. Onun tabeliyində 54 telekommunikasiya müəssisəsi, Bakı Şəhərlərarası Telefon Mərkəzi, Kabel Magistral Texniki Mərkəzi və Təmir-Tikinti İdarəsi var.
Baktelekom Bakı şəhəri ərazisində dövlət qurumları, idarə, müəssisə, təşkilatlar, eləcə də xarici hüquqi şəxslər üçün bütün növ telefon və radiorabitə xidmətləri göstərir. O özündə 9 telekommunikasiya müəssisəsi, Tikinti və rabitə qurğularının təmiri idarəsi və Azərrabitəlayihə - layihə-araşdırma kontorunu birləşdirir.
