Azərbaycan, Bakı, 30 oktyabr /Trend, müxbir A.Tağıyeva/
İstismar müddəti başa çatmış Ermənistana məxsus Metsamor Atom Elektrik Stansiyasının fəaliyyəti regionun bütün ölkələri üçün böyük təhlükə törədir. Buna görə də Türkiyə həmin AES-in bağlanması üçün bütün beynəlxalq təşkilatlara müraciət edəcək. Bu barədə Trend-ə Türkiyə parlamentinin deputatı Sinan Oğan bildirib.
Oğan qeyd edib ki, Metsamor AES-in fəaliyyəti təkcə Türkiyə üçün deyil, eləcə də bütün region ölkələri, o cümlədən Ermənistanın özü üçün atom partlayışı riskinin mövcudluğu deməkdir.
"Türkiyə beynəlxalq hüquqdan istifadə edərək Metsamor AES-in bağlanmasına nail olmaqdan ötrü bütün beynəlxalq təşkilatlara müraciət edəcək", - deputat deyib.
Onun sözlərinə görə, Türkiyə parlamenti Metsamor AES-in bağlanması üzrə kampaniyaya başlamışdı, lakin bu işin nəticələri barədə danışmaq hələ tezdir. Deputat, habelə bu kampaniyada qeyri-hökumət təşkilatlarının və region ölkələrindəki QHT-lərin əməkdaşlığının rolunu qeyd edib.
"Mən Türkiyə parlamentinin deputatı kimi region ölkələrinin qeyri-hökumət təşkilatlarını Metsamor AES-in bağlanması üzrə kampaniyada fəal iştirak etməyə çağırıram. Çünki bu stansiyanın fəaliyyəti region ölkələrinin bütün əhalisinin həyatını təhlükə altında qoyur", - Oğan deyib.
Xatırladaq ki, bir müddət əvvəl Türkiyə KİV Ermənistan hökumətinin Metsamor AES-in işini 2023-cü ilədək uzatmaq haqqında qərar qəbul etməsi ilə bağlı məlumat vermişdi.
