Gürcüstan, Tbilisi, 1oktyabr / Trend , müxbir N.Kirtsxaliya/ Rusiya qoşunlarının Gürcüstana yeridilməsinədək mövcud status - kvonun bərpası münaqişəli zonalarda problemin birdəfəlik həlli olacaq, - Gürcüstan prezidenti Mixail Saakaşvili çərşənbə axşamı Aİ - nin təhlükəsizlik və xarici əlaqələr üzrə Ali Komissarı Xavyer Solana ilə görüşdə bəyan edib.
"Biz deyə bilmərik ki, Rusiya qoşunlarının bufer zonaları tərk etməsindən xoşbəxtik. Lakin bu, prosesin əvvəlidir və o başa çatmalıdır", - Saakaşvili bildirib. Gürcüstan prezidenti vurğulayıb ki, havalar soyuduqca çadırlarda yaşamaq çətinləşir, qaçqınlar qışa öz doğma evlərinə qayıtmalıdırlar.
"İşğalçıların ölkədən çıxarılması prosesi başlamalı və sona çatdırılmalıdır. Heç kəs Gürcüstandan özünün əsas prinsiplərindən - ərazi bütövlüyü və müstəqillik prinsiplərindən imtina etməyi tələb edə bilməz", - o qeyd edib. Saakaşvili vurğulayıb ki, Gürcüstan məsələni dinc yolla həll etmək istəyir və bu məsələdə Aİ - nin yardımına ümid edir. "Biz bu problemin qəti şəkildə həlli üçün Aİ ilə işləməyə, Rusiya ilə danışıqlar aparmağa hazırıq", - o bildirib.
Gürcüstan prezidenti vurğulayıb ki, Xavyer Solana Gürcüstana beynəlxalq müşahidəçilərin göndərilməsinin zəruri olduğunu bəyan edən ilk avropalı diplomat olub. Lakin o zaman çoxları onun bu rəyini paylaşmırdırlar və yalnız indi - faicəli hadisələrdən sonra onunla razılaşıblar. "Prinsipial məsələlərdə heç bir güzəşt olmayacaq. Biz üzərimizə öhdəlik götürmüşük və onları sonadək yerinə yetirmək lazımdır. Biz işğal şəraitindəyik. Lakin biz insanların qışa doğma evlərinə qayıtmaları üçün əlimizdən gələni etməliyik", - Saakaşvili vurğulayıb.
O, həmçinin, xatırladıb ki, oktyabrın 22 - də Gürcüstanın donorlarının konfransı keçiriləcək, Fransa prezidenti Nikolya Sarkozi isə, Avropa ölkələrinin birinci şəxslərinin Tbilisiyə səfərlərini təmin etməyi öhdəsinə götürüb. Bu şəxslər öz səfərləri ilə Gürcüstanın müstəqilliyi və onun ərazi bütövlüyünü təmin edəcəklər.
Müəlliflə əlaqə saxlamaq üçün elektron ünvan: [email protected]