Gürcüstan, Tbilisi, 16 aprel /Trend, müxbir N.Kirsxaliya/
Gürcüstan Parlamentinin İctimaiyyətlə əlaqələr departamenti bəzi agentliklərin ("Pirveli" və "İnterpress") Gürcüstan Parlamenti nümayəndə heyətinə Polşa tərəfinin Varşavaya Polşa Prezidentinin dəfn mərasiminə gəlməkdən imtina etməsinə dair müraciət etməsi barədə məlumat yaymalarına görə xüsusi bəyanat yayıb.
Departament bildirir ki, həmin məlumat həqiqətəuyğun deyil, çünki Polşa tərəfi belə müraciət etməyib. Parlament nümayəndə heyətinin Polşaya səfərinə gəlincə, o zaman Polşa tərəfi dəfn mərasiminin Varşavada, yaxud Krakovda keçiriləcəyini hələ müəyyən etmədiyinə görə sonadək Gürcüstan nümayəndə heyətinin tərkibi və forması dəqiqləşdirilməmişdi.
"Bu mərhələdə isə dəqiq məlumdur ki, bazar günü Krakovda dəfn mərasimində Gürcüstan Prezidenti Mixail Saakaşvili iştirak edəcək", - məlumatda deyilir.
Şənbə günü matəm tədbirlərinə gəlincə isə departament qeyd edir ki, əgər Polşa hakimiyyəti qərar çıxarsa ki, bu, Polşanın milli tədbiridir, belə olan halda Varşavaya heç bir ölkənin nümayəndə heyəti, o cümlədən Gürcüstan nümayəndə heyəti də gəlməyəcək. "Bir daha vurğulayırıq ki, əgər belə qərar qəbul edilsə, həmin qərar yalnız Gürcüstana deyil, eyni zamanda, bütün xarici ölkələrə şamil olunacaq", - bəyanatda deyilir. Həmçinin qeyd edilir ki, bu səbəbdən deputat Eldar Kvernadzenin şərhi məhz yuxarıda göstərilən səbəblərə görə düzgün verilməyib.
