İran Parlamenti rəsmi Tehranın Beynəlxalq Atom Enerjisi Agentliyi ilə əməkdaşlığına limitqoyulma layihəsini müzakirəyə çıxarıb. Parlamentin Milli təhlükəsizlik və xarici siyasət komitəsinin vitse-prezidenti İsmayıl Kosəri Fars agentliyinə bildirib ki, bu layihə iyunun 13-də səsverməyə çıxarılacaq və təsdiq olunacağı təqdirdə, rəsmi Tehran dərhal BAEA ilə əməkdaşlığını məhdudlaşdıracaq.
İyunun 9-da BMT Təhlükəsizlik Şurası İrana qarşı yeni sanksiyalar tətbiq edib. 1929 saylı qətnamə çərçivəsində İranın nüvə proqramına qarşı sanksiyalar rəsmi Tehran tərəfindən sərt qarşılanıb. İran Prezidenti Mahmud Əhmədinejad BMT TŞ-nin İranın nüvə proqramına qarşı yeni sanksiyaları "bir parça dəyərsiz kağız" adlandırıb.