Bakı. Trend:
59 yaşlı britaniyalı milyarder, "Autonomy Corporation"ın həmtəsisçisi və "Invoke Capital"ın yaradıcısı Maykl Linç və qızı Hanna Linçin cəsədi İtaliya sahillərində qəzaya uğramış yaxtanın içərisindən tapılıb.
Trend bu barədə xarici KİV-lərə istinadən xəbər verir.
Məlumata görə, Maykl Linç və qızı Hanna Siciliya sahillərində baş verən yaxta qəzasında həlak olublar.
Daha əvvəl "Reuters" xəbər vermişdi ki, dalğıclar 49 metr dərinliyə batan yaxtadan dörd nəfərin cəsədini çıxarıblar. Ölənlərin kimliyi əvvəlcə açıqlanmayıb. Hazırda yaxtanın daha iki sərnişini itkin düşənlər siyahısındadır.
Xatırladaq ki, texnologiyalar sahəsində 59 yaşlı britaniyalı sahibkar Maykl Linçin itkin düşdüyü ilə bağlı avqustun 19-da xəbər verilib. Məlumatlara görə, Linç yaxtanın Siciliya sahillərində qəzaya uğramasından sonra itkin düşüb. İtaliyanın sahil mühafizəsinin sözlərinə görə, içərisində 22 nəfərin olduğu, 56 metr uzunluğundakı "Bayesian" gəmisi Portiçello limanı yaxınlığında lövbər salıbmış.