Bakı. Trend:
Kanadanın ictimai təhlükəsizlik naziri Dominik Leblan, ABŞ-a qeyri-qanuni miqrasiya axınını məhdudlaşdırmaq məqsədilə sərhəd nəzarətinin gücləndiriləcəyini açıqlayıb.
Trend xəbər verir ki, Leblan bu bəyanatı, Kanadanın baş naziri Castin Trüdonun ABŞ-ın seçilmiş prezidenti Donald Trampla keçirdiyi görüşü şərh edərkən verib. Görüşdə enerji təhlükəsizliyi, boru kəmərləri, qlobal münaqişələr, Çin və ticarət rüsumları kimi mövzular müzakirə edilib.
Nazirin sözlərinə görə, sərhəddə təhlükəsizlik tədbirləri yaxın
həftələrdə daha da gücləndiriləcək:
"Biz əlavə pilotsuz uçuş aparatları, polis helikopterləri
yerləşdirmək və sərhəd xidmətinin şəxsi heyətini yenidən
formalaşdırmaq planlaşdırırıq."
Bu tədbirlər, ABŞ-ın Kanadadan idxal edilən məhsullara 25%-lik ticarət rüsumları tətbiq etməklə bağlı təhdidlərinin də fonunda gündəmə gəlib. Trüdo və Tramp sərhəd təhlükəsizliyi ilə bağlı əlavə tədbirlərin həyata keçirilməsini müzakirə edib.