Bakı. Trend:
Fransada güclü qar və şaxta səbəbilə çərşənbə günü baş verən yol qəzalarında azı beş nəfərin öldüyü təsdiqlənib.
Trend xəbər verir ki, bu barədə Fransanın Nəqliyyat Nazirliyi məlumat yayıb.
Bildirilib ki, Parisin "Şarl de Qoll" hava limanında güclü qar və şaxtalı hava səbəbindən təxminən 100 reys, "Orli" hava limanında isə daha 40 reys təxirə salınıb.
Buzlu yollar səbəbilə Paris və ətrafında ictimai avtobus xidmətləri dayandırılıb, lakin metro və şəhərətrafı qatarların əksəriyyəti fəaliyyətini davam etdirir.
Fransa Meteorologiya Xidmətinin məlumatına görə, ölkənin 38 departamentində güclü qar və qara buzla bağlı xəbərdarlıq elan olunub. Bəzi bölgələrdə qarın qalınlığı artıq 3-7 sm-ə çatıb.
Hava şəraiti "mövsüm üçün nadir" sayılır və hakimiyyət Paris sakinlərini mümkün olduqda evdən işləməyə və vacib olmadıqca səyahət etməməyə çağırıb.