Azərbaycan, Bakı, 29 iyun /Trend, müxbir İlkin İzzət/
Rio Olimpiya oyunlarındakı iştirakımız əvvəlki olimpiadalardan daha uğurlu olacaq.
Trend xəbər verir ki, bunu Milli Olimpiya Komitəsinin (MOK) 1-ci vitse-prüzidenti Çingiz Hüseynzadə jurnalistlərə açıqlamasında deyib.
Onun sözlərinə görə, Azərbaycan növbəti olimpiya oyunlarında daha böyük uğurlar qazanacaq: "Rio Olimpiadasında biz idmançılarımızdan əlbəttə ki, yükaək nəticələr gözləyirik. Onu da nəzərə almaq lazımdır ki, Avropa Oyunlarında təkcə Avropa ölkələri idisə, Olimpiya otunlarında bütün dünya iştirak edir. Bu bizim idmanımızın inkişafına böyük təkan oldu. Ümid edirəm ki, Rio Olimpiya oyunlarındakı iştirakımız əvvəlki olimpiadalardan daha uğurlu olacaq. Əvvəl də uğurlu olub. London olimpiadası bizim üçün çox uğurlu keçib. Bu dəfə inşallah daha uğurlu keçəcək".
Ç.Hüseynzadə Avropa Oyunlarında Azərbaycan üçün qeyri-ənənəvi idman növlərində də uğur qazanılmasını belə şərh edib: "Azərbaycanda idman həmişə hərtərəfli inkişaf edib. Bu gün biz məsələn, gimnastika, qılıncoynatmadakı uğurlarımızı qeyd edirik. Lakin tarixə baxsaq, görərik ki, bizim bu idman növlərində də Olimpiya çempionlarımız olub. Ümumiyyətlə, ötən əsrin 90-cı illərində olan hərc-mərclik, ölkədə olan gərgin vəziyyət idmanımıza da təsir etmişdi. Bu gün isə biz bütün potensiallarımızı bərpa etmişik. Artıq Azərbaycan qüdrətli dövlətdir və idmanda da öz sözünü deyir".