Azərbaycan, Bakı, 27 dekabr /Trend Life, müxbir E.Hüseynzadə/
Azərbaycanın əməkdar artisti Tünzalə Ağayeva Ukraynada Donetsk Vilayəti Azərbaycanlıları Konqresinin beş illiyi münasibətilə çıxış edib.
"Dünyanın müxtəlif ölkələrində fəal Azərbaycan diasporu qarşısında çıxış etmək mənə həmişə xoşdur", - Ağayeva Trend Life-a bildirib.
Onun çıxışı Donetsk Dram Teatrında baş tutub. Konsertdə ondan başqa Ukraynanın xalq artisti İrina Bilık da ifa edib.
"Bu zal mənə Azərbaycan Opera və Balet Teatrını xatırlatdı. Orada sadəcə heyranedici səs var idi. Bu da bir müğənni kimi mənim üçün çox vacib idi", - Ağayeva deyib.
Müğənni müxtəlif albomlardan mahnılar - bəstəkar hitləri, xalq musiqisi, caz mahnıları ifa edib.
"Mən diaspor üçün oxuyanda səhnədə çox qala bilmirəm və tamaşaçılarla birgə oxuduğum zala düşürəm, bu dəfə də belə oldu. Biz az qala xorla oxuyurduq. Onların qəlblərinin mənimlə oxuduğunu hiss etdim, axı onlar Vətəndən uzaqda yaşayırlar, həmin axşamkı musiqi isə onları doğma torpaqla birləşdirdi", - müğənni qeyd edib.
Tamaşaçılar müğənnini o qədər isti qarşılayıblar ki, o, planlaşdırıldığından iki dəfə çox oxuyub.
Tünzalə Ağayeva 2003-cü ildə Yaltada (Ukrayna) beynəlxalq musiqi müsabiqəsində "Axar çaylar " mahnısına görə Qran-pri mükafatına layiq görülüb.
