Bakı. Trend:
Qaradağlı soyqırımında öldürülən 30 nəfərin meyiti təhvil verilməyib.
Bu barədə Trend-ə Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasından məlumat verilib.
Qeyd olunub ki, Azərbaycan Respublikası, Xocavənd rayonu, Qaradağlı kəndinin Ermənistan hərbçiləri və terrorçu quldur dəstələri tərəfindən işğalından 31 il keçir.
17 fevral 1992-ci il tarixdə milliyyətcə erməni beynəlxalq terrorçu, ASALA terror təşkilatının lideri Monte Melkonyanın rəhbərliyi ilə Azərbaycan Respublikası, Xocavənd rayonu, Qaradağlı kəndi işğal edilərkən dinc əhaliyə qarşı amansız soyqırımı həyata keçirilmişdir.
İşğal zamanı kənddə olan 116 nəfərdən 57 nəfər qətlə yetirilmişdir. Kənd sakinlərinin qətlində Ermənistan hərbçiləri ilə yanaşı mülki ermənilər, o cümlədən Qaradağlı kəndinə yaxın kəndlərin erməni sakinləri də yaxından iştirak etmişlər.
Əsir-girov götürülmüş kənd sakinləri amansız işgəncələrə məruz
qalmış, onlara qarşı aşkar soyqırımı həyata keçirilmiş, etnik
təmizləmə aparılmışdır.
Soyqırımı zamanı qətlə yetirilmiş 57 nəfərdən 27 nəfərin meyiti
sonradan Azərbaycan tərəfinə qaytarılsa da, 30 nəfərin meyiti
təhvil verilməmişdir.
Bununla yanaşı, girov götürüldükdən sonra əvvəlcə işğal edilmiş Xankəndi şəhərinə, oradan isə naməlum istiqamətə aparılmış 9 nəfərin də sonrakı taleyi barədə məlumatlar gizlədilmişdir. Hazırda Əsir və itkin düşmüş, girov götürülmüş vətəndaşlarla əlaqədar Dövlət Komissiyasında Xocavənd rayonu, Qaradağlı kəndi işğalı zamanı 39 nəfər itkin dümüş şəxs kimi axtarışdadır. Onlardan 33 nəfər kişi, 5 nəfər uşaq (oğlan), 1 nəfər isə qadındır.
Əsir-girov götürülmüş 50 nəfər (47 mülki, 2 hərbçi, 1 polis əməkdaşı) isə sonradan azad olunmuşdur.