Azərbaycan, Bakı, 20 sentyabr /Trend, müxbir K.Zərbalıyeva/
Bakıda Mərkəzi Univermağa partlayıcı qurğu qoyulması barədə yalan məlumat verən şəxs saxlanılıb.
Bu gün səhər hüquq-mühafizə orqanlarına Bakı şəhəri Səbail rayonunda yerləşən "Mərkəzi Univermaq" ASC-nin binasına partlayıcı qurğu yerləşdirilməsi barədə məlumat daxil olub.
Daxili İşlər Nazirliyindən Trend-ə verilən məlumata görə, araşdırmalar zamanı yalan məlumatın Şamaxı rayon sakini 16 yaşlı T.V. tərəfindən verilməsi müəyyən edilib.
O, saxlanılaraq Səbail rayon Polis İdarəsinə aparılıb.
Fövqəladə Hallar Nazirliyinin müvafiq xilasetmə qüvvələri axtarış-xilasetmə tədbirlərinin görülməsi üçün hadisə yerinə cəlb edilib, aidiyyəti qurumlar məlumatlandırılıb.
Xilasedicilər hüquq-mühafizə orqanlarının mütəxəssisləri ilə birgə apardıqları axtarış işləri nəticəsində həmin binada şübhəli əşya aşkar etməyiblər.