Azərbaycan, Bakı, 8 aprel /Trend, müxbir İ.İzzət/
Aprelin 7-də Daşkəsən rayonda Azərbaycan Silahlı Qüvvələrinin hərbi qulluqçusu tərəfindən ailə münaqişəsi zəminində qətl törədilib. Bu barədə Trend-ə hüquq-mühafizə orqanlarından məlumat verilib.
Müdafiə Nazirliyinin N saylı hərbi hissəsində müddətdən artıq hərbi xidmət edən, Daşkəsən Rayon Hərbi Komissarlığı tərəfindən hərbi xidmətə çağırılmış 25 yaşlı hərbi qulluqçu Rəşad Məmmədov qeyri-rəsmi nikahda yaşadığı Tünzalə Babayevanı qətlə yetirib.
Rəşad Məmmədov qətl törədən zaman xidmətdə deyil, rəsmi məzuniyyətdə olub.
Faktı Trend-ə Müdafiə Nazirliyinin mətbuat xidmətindən də təsdiqləyiblər.
Qeyd edək ki, Daxili İşlər Nazirliyinin rəsmi məlumatına görə, aprelin 7-də Daşkəsən rayonunun Bayan qəsəbəsi ərazisində yerləşən "Bahar" yeməkxanasında rayon sakini Rəşad Məmmədov qısqanclıq zəminində qeyri-rəsmi nikah münasibətində olduğu Füzuli rayon sakini Tünzalə Babayevanı boğub və bıçaqla xəsarət yetirib.
T.Babayeva hadisə yerində ölüb. Daha sonra R.Məmmədov könüllü olaraq Nizami (Gəncə) RPİ-yə gələrək təslim olub.
Hadisəni törətdikdən sonra zəhərləyici maddə qəbul etmiş R.Məmmədovun səhhəti pisləşdiyindən xəstəxanaya yerləşdirilib.