Azərbaycan, Bakı, 28 oktyabr /Trend, müxbir E.Tarıverdiyeva/
Dünən Həştərxanda Dağlıq Qarabağ nizamlanması ətrafında keçirilən danışıqları münaqişənin həll olunmasına həsr edilmiş digər bu cür görüşlər kimi irəliyə doğru addım adlandırmaq çətindir. Lakin başlıcası, onlar geriyə addımların qarşısını alır. Rusiya Dövlət Dumasının deputatı Sergey Markov belə hesab edir.
"Söhbət irəliyə doğru hərəkətdən deyil, geriləməməkdən gedir. Belə görüşlər tərəflərin bir-birinin məntiqini anlamasına kömək edir və bunlar vacibdir", - Markov cümə axşamı Bakıda jurnalistlərə bildirib.
Markov Bakıda Avrasiya Araşdırmaları İnstitutunun təşkil etdiyi "Vətəndaş cəmiyyətinin inkişafında parlamentlərin rolu" mövzusunda "dəyirmi masa" formatında iclasda iştirak edir.
Çərşənbə günü Həştərxanda Azərbaycan, Rusiya və Ermənistan dövlət başçılarının - İlham Əliyev, Dmitri Medvedev və Serj Sarkisyanın üçtərəfli görüşü keçirilib. Görüşdə Dağlıq Qarabağ münaqişəsinin nizamlanma yolları müzakirə olunub. Görüşün müsbət yekunu kimi Bəyannamə imzalanıb. Bəyannamə hərbi əsirlərin və Dağlıq Qarabağ müharibəsi nəticəsində həlak olanların meyitlərinin qaytarılmasını nəzərdə tutur və humanitar xarakter daşıyır.
Markovun sözlərinə görə, münaqişə tərəflərinin və vasitəçilərin görüşdə Dağlıq Qarabağ münaqişəsinin həlli üzrə "yol xəritəsi" yoxdur və regionda sabitliyin pozulması təhlükəsi mövcuddur.
Rusiyanın AŞPA-dakı nümayəndə heyətinin üzvü Markov hesab edir ki, bu gün üstünlük Azərbaycanın tərəfindədir.
"Dağlıq Qarabağ ətrafında münaqişə güc yolu ilə Ermənistanın xeyrinə həll olunmuşdu. Lakin 20 il ərzində inkişaf elə bir yolla getdi ki, qüvvələr nisbəti, tədricən, Azərbaycanın xeyrinə dəyişdi", - Markov deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Markovun firkincə, Azərbaycan hərbi və iqtisadi planda Ermənistanı xeyli geridə qoyub. Lakin münaqişənin hərbi yolla həlli iqtisadi inkişafla əldə olunan irəliləyişi sarsıda bilər.
"Bu gün ölkə rəhbərliyi sayəsində Azərbaycanın imici investisiyalar üçün təhlükəsizlik yer imicidir və bu, vəziyyət dəyişməməlidir", - Markov deyib.
