Azərbaycan, Bakı, 9 iyul /Trend, müxbir T.Cəfərov/
Əgər münaqişə tərəfləri istəyərlərsə, İran Dağlıq Qarabağ probleminin həllində vasitəçilik etməyə və problemin həllinə yardım etməyə hazırdır. Trend-in İranın İRİNN xəbər kanalına istinadən verdiyi məlumata görə, bu sözləri İranın Xarici İşlər Nazirliyinin sözçüsü Abbas Əraqçi bu gün keçirdiyi həftəlik mətbuat konfransında deyib.
Əraqçi bildirib ki, Qarabağ münaqişəsi sülh və danışıqlar yolu ilə həll olunmalıdır: "Münaqişə tərəfləri hələlik Qarabağ münaqişəsinin həllində Minsk Qrupu vasitəsi ilə həllində maraqlıdırlar, lakin Azərbaycan və Ermənistan istəyərsə, biz də bu məsələninin həllinə yardım etməyə hazırıq".
Əraqçi Azərbaycanda keçiriləcək prezident seçkiləri haqda soruşulan sualın cavabında bildirib ki, prezident seçkilərinin keçirilməsi Azərbaycanın daxili işidir və ümid edirik ki, bu seçkilər Azərbaycan xalqının istəyi əsasında və müvəffəqiyyətlə keçiriləcək.
Əraqçi deyib ki, İran və Azərbaycan iki dost və qardaş ölkədirlər və iki ölkə arasında tarixi, siyasi, mədəni və iqtisadi bağlılıqlar mövcuddur.