AŞPA-nın yay sessiyasında cari məsələlərin müzakirəsi zamanı Ermənistanın işğalçılıq siyasəti ilə bağlı faktları səsləndirəcəyik. Bu barədə Trend ə Azərbaycanın AŞPA-dakı nümayəndə heyətinin üzvü Aydın Mirzəzadə bildirib.
Qeyd edək ki, AŞPA-nın yay sessiyası iyunun 26-30-da Strasburqda keçiriləcək. Azərbaycanın nümayəndə heyəti isə Strasburqa iyunun 24-də yola düşəcək.
Millət vəkili bildirib ki, AŞPA-nın gündəliyinə hər hansı bir məsələnin salınması prosesi mürəkkəbdir. Ümumi iclasda qaldırılan hər hansı bir məsələni gündəliyə salmaq mümkün deyil: "Hər hansı bir məsələni qurumun iclasında gündəliyə salmaq üçün o barədə büroya müracəit olunmalıdır. Büro məsələni nəzərdən keçirib məqsədəuyğun hesab edərsə komitəyə göndərir, komitə bu məsələ ilə bağlı məruzəçi təyin edir. Bu, hardasa 6 ay-1 il çəkir".
A.Mirzəzadə onu da vurğulayıb ki, gündəlikdə olan cari məsələlər barədə çıxışlar zamanı lazımi məsələni səsləndirmək olar: "Hər birimiz bir neçə məsələ ilə bağlı çıxışlara yazılmışıq. Bu məsələlərin müzakirəsi ilə yanaşı Ermənistanın işğalçılıq siyasəti, ermənilər tərəfindən işğal edilən ərazilərdə yanğınların törədilməsi, mədəni işğalla bağlı faktları ortaya qoyacağıq".