Dağlıq Qarabağ münaqişəsinin həlli üçün Azərbaycanın həmişə siyasi iradəsi olub və olmaqdadır. Bu barədə Trend ə Prezident Aparatının Xarici Əlaqələr şöbəsinin müdiri Novruz Məmmədov bildirib.
Onun sözlərinə görə, belə siyasi iradə sülh danışıqlarını davam etdirmək istəyində əksini tapır, lakin rəsmi Bakı istərdi ki, "böyük səkkizliy"in zirvə görüşündə münaqişə tərəfləri təkcə siyasi iradəyə malik olmağa çağırılmasın, həm də beynəlxalq hüquq norma və prinsipləri çərçivəsində problemə münasibət bildirilsin. Onün sözlərinə görə, "böyük səkkizliy"ə dünyadakı hadisələri və beynəlxalq əlaqələri foormalaşdıran dövlətlər daxildir və təəssüflənmək olar ki, G8 ölkələri öz maraqlarını qlobal maraqlardan üstün tutur. "Hər halda belə təəssurat yaranır. Buna görə belə neytral mövqe bildirilir və bu, bizi, təbii ki, qane etmir" - deyə o qeyd edib.
G8 ölkələrinin xalqları sülhə çağırmasına gəldikdə, N.Məmmədov vurğulayıb ki, Azərbaycan prezidentinin əsas vəzifəsi sülh, demokratiya və təhlükəsizlik şəraitində ölkənin inkişafını təmin etməkdir. O əlavə edib ki, Azərbaycan xalqı münaqişənin istənilən həlli variantına, xüsusilə də, sülh yolu ilə tənzimlənməsinə hazırdır.
