...

Müxalifət bloku siyasi vəziyyəti dəyişmək üçün kütləvi tədbirlər keçirəcək

Siyasət Materials 28 Fevral 2008 11:48 (UTC +04:00)

Azərbaycan, Bakı, 28 fevral / Trend , müxbir S.İlhamqızı/ Müxalifətçi "Azadlıq" bloku Azərbaycanda siyasi vəziyyəti dəyişdirmək üçün kütləvi tədbirlər keçirəcək. Bu barədə Trend ə blokun həmsədri Əli Əliyev məlumat verib.

Onun sözlərinə görə, blok Seçki Məcəlləsinin və "Sərbəst toplaşmaq azadlığı haqqında" qanunun hakimiyyətlə beynəlxalq təşkilatlar arasında müzakirəsinin yekunlaşmasını, parlamentdə müzakirəyə çıxarılmasını gözləyir. "Bu qanunların hansı formaya salınacağını gözləyirik, çünki ona uyğun addımlar atacağıq. Həmin qanunlar hakimiyyətin istədiyi formada qəbul olunsa, kütləvi etiraz aksiyaları keçirə bilərik"-deyə Əliyev bildirib.

"Azadlıq" bloku seçki komissiyalarının paritet əsasda - iqtidarla müxalifət arasında bərabər formalaşdırılmasını tələb edir. Hakimiyyət nümayəndələri isə bildirirlər ki, buna ehtiyac yoxdur və seçki komissiyalarının indiki tərkibini ən məqbul hesab edirlər. MSK-nın 18 nəfərlik tərkibi - parlamentdə çoxluq təşkil edən, azlıqda qalan partiyaların və bitərəf deputatların nümayəndələrindən ibarət formalaşıb. Müxalifət hesab edir ki, bu tərkib hakimiyyətin nəzarəti altındadır.

Əliyev bildirib ki, "Azadlıq" bloku seçki komissiyalarının tərkibinin dəyişdirilməsi, sərbəst toplaşmaq hüququnun təmin olunması, cəmiyyəti qarşıdan gələn prezident seçkisi ilə bağlı fəallaşdırmaq üçün təkbaşına mübarizə aparacaq.

"Keçirəcəyimiz tədbirlərdə biz yalnız öz gücümüzə arxalanacağıq. Amma başqa müxalifət partiyaları da bizə qoşulmaq istəyərsə, bunun işimizə ziyanı olmayacaq"-deyə blokun həmsədri bildirib.

"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.

Xəbər lenti

Xəbər lenti