Azərbaycan, Bakı, 18 mart / Trend ", müxbir Q.Cəbiyev/ Azərbaycanın müxalif "Azadlıq" bloku kütləvi aksiyaların keçirilməsini müəyyən müddətə təxirə salıb. "Ölkədə seçki ilə bağlı qeyri-müəyyənliklərin hələ də qalması kütləvi aksiyaların başlanma vaxtını yubadır" çərşənbə axşamı Trend a blokun üzvü, Vətəndaş və İnkişaf Partiyasının (VİP) sədri Əli Əliyev bildirib.
Azərbaycanda prezident seçkisi oktyabrda keçiriləcək. Üç müxalifət Xalq Cəbhəsi, Liberal və Vətəndaş və İnkişaf partiyalarının təmsil olunduğu "Azadlıq" bloku seçki komissiyalarının paritet əsasda formalaşmasını, sərbəst toplaşmaq azadlığı barədə qanunun dəyişməsini istəyir. Əks təqdirdə blok seçkini boykot edəcəyini və martın sonu-aprelin əvvəlində kütləvi aksiyalara başlayacağını açıqlamışdı.
Əliyev vurğulayıb ki, Azərbaycan hakimiyyəti ilə Avropa Şurasının Venesiya Komissiyası arasında seçki qanunvericiliyi, sərbəst toplaşmaq azadlığı barədə qanunla bağlı müzakirələr başa çatmadığından, lazımi qərarlar çıxarılmır. Əliyev bildirib ki, sərbəst toplaşmaq azadlığı barədə qanun dəyişməsə, blok şəhərin kənarında deyil, mərkəzdə aksiya keçirməyə üstünlük verəcək.
