Azərbaycan, Bakı, 03 aprel / Trend ", müxbir Q.Cəbiyev/ İqtidaryönlü Azərbaycan partiyalarının sədrləri vəzifələrindən getmək fikrində deyillər. "Partiyada məndən sonra sədrliyi üzərinə götürməyə və partiyanı daha irəliyə aparacaq şəxs yoxdur" cümə axşamı Trend New"a Ana Vətən Partiyasının (AVP) sədri Fəzail Ağamalı bildirib.
AVP-nin iyun ayının əvvəlində keçirilməsi planlaşdırılan qurultayının gündəliyinə partiyanın sədrliyinə seçkilərin keçirilməsi salınmayıb.
Ağamalı deyib ki, ondan sonra gələn sədrin partiyanı daha da irəli aparacağına əmin olandan sonra sədrlikdən gedəcək. Hazırda partiyanın bir neçə sədr müavini postu boşdur və qurultaydan sonra həmin postlara təyinatlar planlaşdırılır.
AVP Ağamalı tərəfindən təsis edilib. Partiya iqtidaryönlü siyasi xətt tutub.
Digər iqtidaryönlü Azərbaycana Naminə Alyans Partiyasının (ANAP) sədri Abutalıb Səmədov cümə axşamı Trend New"a bildirib ki, o, hələ partiyanın sədri vəzifəsindən getməsində heç bir əsas görmür. "Mən dövlət vəzifəsinə təyin olunmağıma baxmayaraq, hələ də partiyanın sədriyəm və bu vəzifədən getmək fikrim yoxdur" ANAP sədri əlavə edib.
Səmədov hazırda Müəllif Hüquqları üzrə Dövlət Agentliyinin rəhbəri vəzifəsində də çalışır.
ANAP 90-cı illərin əvvəllərində Səmədov tərəfindən təsis olunub. Partiya hakimiyyətin siyasətini müdafiə edir. Ötən çağırış Milli Məclisdə millət vəkili olan Səmədov 2006-cı ilin avqustunda isə prezidentin sərəncamı ilə Müəllif Hüquqları üzrə Dövlət Agentliyinin rəhbəri təyin olunub.
Səmədov deyib ki, dövlət məmuru olması partiya işlərini aparmağa mane olmur. Hazırda ANAP oktyabrda keçiriləcək prezident seçkisinə hazırlaşır.
Azərbaycanda seçki oktyabrda keçiriləcək.
Məqalə müəllifi ilə əlaqə ünvanı: [email protected]