...

Azərbaycanda seçkini boykot etməyin tərəfdarı olan partiyaların birliyi yaradıla bilər

Siyasət Materials 22 Aprel 2008 17:23 (UTC +04:00)

Azərbaycan, Bakı, 21 aprel/ Trend , müxbir İ.Əlizadə/ Azərbaycanda keçiriləcək prezident seçkisinə qatılmaq istəməyən və boykot tərəfdarı olan müxalifət partiyalarının birliyi yaradıla bilər. "Prezident seçkisini boykot edən müxalifət partiyalarının birliyinin yaradılacağını istisna etmirəm", -deyə çərşənbə axşamı Trend -a açıqlamasında Azərbaycan müxalifətinin əsas birliyi olan "Azadlıq" blokunun həmsədri, Vətəndaş və İnkişaf Partiyasının sədri Əli Əliyev bildirib.

Prezident seçkisi 2008-ci il oktyabrın 15-də keçiriləcək. "Azadlıq" bloku bəyan edib ki, seçki komissiyalarının tərkibində dəyişiklik edilməsə, kütləvi aksiyaların keçirilməsinə qoyulan məhdudiyyətlər aradan qaldırılmasa və müxalifət partiyalarının fəaliyyətinə şərait yaradılmasa, prezident seçkisində iştirak etməyəcək.

Azərbaycan Milli İstiqlal və Açıq Cəmiyyət partiyaları da hazırkı şərtlərlə prezident seçkisində iştirak etməyin tərəfdarı olmadıqlarını bildirib.

Əliyev qeyd edib ki, iki ay müddətində hansı partiyaların pezident seçkisini boykot edəcəyi dəqiqləşəcək və bundan sonra əməkdaşlıq formasının tapılması ilə bağlı müzakirələr başlaya bilər.

"Azadlıq" bloku boykot tərəfdarı olan müxalifət partiyalarının yaxından əməkdaşlıq etməsinə tərəfdardır və buna hazırdır", -deyə blokun həmsədri əlavə edib.

Müxalifəti təmsil edən Açıq Cəmiyyət Partiyasının (ACP) sədr müavini Yaqub Abbasov bildirib ki, əgər hazırkı şərait dəyişməsə, namizədlərə bərabər şərait yaradılmasa, seçki komissiyaları iqtidar və müxalifət nümayəndələrinin iştirakı ilə paritet əsasda formalaşdırılmasa və xaricdə yaşayan siyasi mühacirlərin ölkəyə qayıtmasına şərait yaradılmasa, prezident seçkisini baykot edəcəklər.

ACP lideri, eks-spiker və partiyanın prezidentliyə namizədi Rəsul Quliyev 1996-cı ildən ABŞ-da mühacirətdədir.

"ACP seçkini boykot edən partiyaların birliyinin yaradılmasına müsbət yanaşır. Amma bizim orada iştirak edib-etməyəcəyimizi indidən demək olmaz və bu, gələcəyin məsələsidir", -deyə Abbasov əlavə edib.

Azərbaycan Milli İstiqlal Partiyasının təbliğat və mətbuat katibi, sədrliyə namizəd Əli Orucov isə qeyd edib ki, partiya boykot haqqında rəsmən qərar qəbul etməyib: "Partiya üzvlərinin bir qismi hesab edir ki, prezident seçkisi boykot olunmalıdır. Lakin bununla bağlı rəsmi qərar qəbul etməmişik. Ona görə də bizim boykot tərəfdarlarının birliyində təmsil olunacağımızı demək tezdir".

Məqalə müəllifi ilə əlaqə ünvanı: [email protected]

Xəbər lenti

Xəbər lenti