Azərbaycan, Bakı, 25 aprel/ Trend , müxbir C.Babayeva/ Azərbaycanın müxalifət partiyalarının "beşlər" formatı Müsavat partiyasının 4 may mitinqinə dəstək verəcək. Azərbaycan Milli İstiqlal Partiyasının mətbuat və təbliğat katibi Əli Orucovun cümə günü Trend -a verdiyi məlumata əsasən, bu barədə qərar "beşlər"in cümə axşamı keçirilən toplantısında qəbul olunub.
"Beşlər"də Azərbaycan Demokrat Partiyası, AMİP, Tərəqqi, Müsavat "Azərbaycan Naminə" ictimai forum təmsil olunur.
Müsavat Partiyası mayın 4-də Seçki Məcəlləsinə dəyişikliklər edilməsi tələbi ilə mitinq keçirmək barədə qərar qəbul edib. Mitinqdə seçki kampaniyası müddətinin 4 aydan 2 aya qədər endirilməsi cəhdlərinə etiraz bildiriləcək. Həmçinin vətəndaşların mülkiyyət obyektlərinin adekvat təzminat ödənmədən sökülməsinə, son bahalaşma hallarına qarşı etiraz şüarları da səsləndiriləcək.
Orucovun sözlərinə görə, Müsavat Partiyası ilə "beşlər" formatında əməkdaşlıq, fikir mübadiləsi aparılırsa, onların mitinqinə dəstək vermək təşəbbüsü də təbii qarşılanmalıdır.
"Dəstək Müsavatın mitinqinin təşkilatçılığında iştirak etməkdən ibarət olmayacaq. "Beşlər"də təmsil olunan siyasi qüvvələrin nümayəndələri müstəqil formada mitinqə qatılacaq",deyə Orucov bildirib.
Orucovun qeyd etdiyi kimi, "beşlər"də təmsil olunan siyasi qüvvələrə mitinqə dəstək verməkdə sərbəstlik verilib.