Rusiya, Moskva, 14 may/ Trend , müxbir R.Ağayev/ Rusiya Azərbaycanlıları Federal Milli-Mədəni Muxtariyyətinin ("AzərRos" FMMM) prezidenti hesab edir ki, Qafqaz Albaniyasına dair elmi simpoziumdan siyasi məqsədlə istifadə edilməsi yalnız Azərbaycana deyil, Rusiyaya da zərər yetirəcək. "Simpozium çox yüksək elmi səviyyədə keçirilir. Lakin, kimsə bu simpoziumu siyasi məqsədlərdə istifadə etmək istəsə, yalnız Azərbaycana deyil, Rusiyaya da zərər yetirəcək", - "AzərRos" FMMM-in prezidenti Soyun Sadıqov eksklüziv olaraq Trend -a bildirib.
Mayın 14-də Moskvada, RF prezidenti yanında Rusiya Dövlət Xidməti Akademiyasının və Federal Ləzgi Milli-Mədəni Muxtariyyətinin birgə təşkilatçılığı ilə Moskvada "Qafqaz Albaniyası və ləzgi xalqları: tarixi-mədəni irs və müasirlik" beynəlxalq simpoziumu keçirilir. Azərbaycan tərəfinin iştirakdan imtina etdiyi tədbir çərçivəsində, ləzgilərin Azərbaycana qarşı ərazi iddialarının irəli sürüldüyü ədəbiyyat yayılır.
Sadıqov simpoziumun keçirilməsində təşkilatçıların təşəbbüsünü alqışlayıb. "Hər bir xalq öz tarixini, mədəniyyətini, köklərini, dini etiqadını bilməlidir. Lakin, sən öz tarixin haqqında açıq şəkildə danışırsansa, siyasi çalardan qaçmaq, demək olar ki, mümkün deyil. Belə ki, bu artıq özü müəyyən xarakterli siyasətdir", - Sadıqov bildirib.
Rusiya azərbaycanlıları FMMM-i prezidentinin rəyinə görə, nə Azərbaycan, nə erməni, nə də gürcü xalqı alban köklərinə malik deyillər. "Albanlar öz köklərini saxlayan tamamilə ayrı xalqdır. Siz adıgey xalqı ilə tanış olsanız, anlayarsınız ki, adıgey xalqının mədəniyyəti, dili və adətləri dəqiqliklə alban mədəniyyəti, dili və adətləri ilə üst-üstə düşür", - Sadıqov əlavə edib.
O təəssüflə vurğulayıb ki, erməni tarixçiləri sovet döründə də, indi də, Albaniyanın "Böyük Ermənistan"ın tərkib hissəsi olduğunu sübut etməyə çalışırlar. "Son zamanlar ləzgi xalqı da özünü albanlarla bağlamağa cəhd göstərir. Lakin, ləzgi xalqının kökləri albanlaraqədərki Qafqaz tarixinə gedir", - Sadıqov bildirib.
"AzərRos" FMMM prezidentinin rəyinə görə, hazırda ləzgi xalqının böyük bir hissəi Azərbaycanda, bir hissəi Rusiyada, xüsusilə də Dağıstanda yaşayır. "Ərazi iddialarına dair hanısa imkanlardan danışmazdan əvvəl Azərbaycanda yaşayan ləzgilərin rəyini öyrənmək lazımdır - onlar bunu istəyirlər ya yox? Əlbəttə ki, yox. Sadəcə, hər bir millətdə tarixi müzakirələrdən siyasi fayda götürməyə çalışan elementlər var. Normal millət heç zaman separatçılığa getməz", - Sadıqov söyləyib.
O, Azərbaycandakı ləzgilərin bütün digər vətəndaşlar kimi bərabər hüquqlara malik olduqlarını bildirib. "Azərbaycanda ləzgilərin hüquqlarının pozulması barədə necə söhbət gedə bilər ki, ölkənin müdafiə naziri, baş qərargahın rəisi, Gəncə şəhərinin rəhbəri milliyətcə ləzgidirlər. Ləzgilər hökumət strukturularında, o cümlədən də DİN-də və s. geniş təmsil olunublar. Ləzgi və Azərbaycan xalqları çox şeydə bənzərdirlər, sadəcə, bəzən normal millətlərarası münasibətlərə zəhər buraxan xarici qüvvələri təcrid etmək lazımdır. Bunu vaxtında dayandırmaq lazımdır", - Rusiya azərbaycanlıları FMMM-in prezidenti qeyd edib.
Sadıqov hazırda Moskvada keçirilən elmi müzakirələrdə azərbaycanlı tarixçilərin iştirak etməməsini qeyri-normal hesab edir. "Azərbaycanın nümayəndə heyətinin iştirak etməməsinin səbəbləri aydın deyil və təəssüf doğurur. Belə ki, Ermənistan, Gürcüstan, Dağıstanın alimləri burada çox fəal iştirak edirlər", - o bildirib.
FLMMM və RF Dövlət Dumasının milli məsələlər üzrə Komitəsi tərəfindən dərc edilən "Ləzgi və ləzgidilli xalqların müasir problemləri" kitabçasında ləzgi xalqının Milli Şurasının sədri, professor Q.Əbdürrəhimovun "ötən əsrin 20-ci illərində ləzgi xaqlının zorla parçalanması və ləzgi xalqına qarşı etnosidi tanımağa" səsləyən çağırışı öz əksini tapıb. Kitabçada, "RF və Azərbaycan Respublikası arasında sərhədlərin delimitasiyasının qanunsuzluğu, sərhədlərə yenidən baxılması və Ləzgistanın yaradılması məqsədilə Azərbaycanın şimal rayonlarının Dağıstana birləşdirilməsinin zəruriliyi" vurğulanır.
Simpozium çərçivəsində, Dağıstan Respublikası Pedaqogika ETİ-nin əməkdaşı Qurban Xalikoviçin 2007-ci ildə Mahaçqalada nəşr olunmuş "Ləzgistan dünya xəritəsində" kitabı 300 rubla satılır. Bu kitabda Azərbaycan və azərbaycanlıların tarixi-mədəni irsi tamamilə ləzgiləşdirilib, azərbaycanlılar və Azərbaycanın özü isə, tarixi kontekstdə dövlət kimi, ümumiyyətlə, xatırlanmayıb.
