Azərbaycan, Bakı, 23 may / Trend , müxbir C.Babayeva/ Azərbaycanın müxalif "Azadlıq" partiyasının sədri Əhməd Orucun fikrincə, "Azadlıq" blokunun Seçki Məcəlləsinə əlavə və dəyişikliklərlə bağlı müxalifətin vahid mövqeyini əks etdirəcək sənədin qəbul olunacağı ümumrespublika müşavirəsinə qatılmamaq barədə qərarı yalnışdır. Bu barədə Oruc cümə günü Trend -a bildirib.
Trend -un arayışı: Gələn həftə Seçki Məcəlləsinə əlavə və dəyişikliklərlə bağlı Azərbaycan müxalifətinin mövqeyinin əks olunacağı vahid sənədin hazırlanması üçün ümumrespublika müşavirəsinin keçirilməsi planlaşdırılır. Vahid sənədin hazırlanması üçün İşçi qrup yaradılıb. Üç müxalifət partiyasından ibarət (Azərbaycan Xalq Cəbhəsi Partiyası, Azərbaycan Liberal, Vətəndaş və İnkişaf Partiyası) "Azadlıq" bloku müşavirəyə dəvəti qəbul etməyəcəyini bəyan edib.
"Özünü aparıcı müxalif qüvvə hesab edən "Azadlıq" blokunun mövqeyi müxalifət düşərgəsi daxilində fikir və iş birliyi yaradılmasına ciddi maneə yaradır" - deyə Oruc bildirib.
Orucun bildirdiyinə görə, "Azadlıq" partiyasının təmsil olunduğu Demokratiya Uğrunda İttifaq (Klassik Xalq Cəbhəsi Partiyası, "Azadlıq", Azərbaycan Milli Demokrat Partiyası) ümumrespublika müşavirəsinə qatılacaq.
Orucun sözlərinə görə, ümumrespublika müşavirəsində bir sıra sənədlər qəbul olunacaq. "Müşavirədə Seçki Məcəlləsi ilə bağlı vahid sənədlə yanaşı, Azərbaycan xalqına və Avropa Parlamentinə müraciət qəbul olunacaq" - deyə Oruc bildirib.