Azərbaycan, Bakı, 04 iyun/ Trend , müxbir E.Babayev/ Azərbaycan müxalifəti seçkiyə hazırlıqla bağlı apardığı işləri təxirə salmayıb. "Seçki Məcəlləsində son əlavə və dəyişikliklərdən sonra bizdə seçkidə iştirakla bağlı müəyyən tərəddüdlər yaransa da, seçkiyə hazırlıqları təxirə salmamışıq" - çərşənbə günü Trend -a Müsavat Partiyasının Mərkəzi İcra Aparatının rəhbəri Arif Hacılı bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Parlament bazar ertəsi Seçki Məcəlləsinə əlavə və dəyişiklikləri qəbul edib. Yeni layihəyə görə, prezidentliyə namizədlərin depozit qoyma şərti götürülür. Namizədlər yalnız imza toplayacaqlar. Namizədliyin qeydə alınması üçün tələb olunan 45 min imzanın 40 minə endirilməsi nəzərdə tutulur. Seçki təbliğatı 120 gündən 75 günə endirilir. Məcəllədə dövlət televiziyasında namizədlərə pulsuz efir vaxtı ayrılması qadağan edilib. Dəyişikliklərdən narazı qalan müxalifət partiyaları boykot taktikasını nəzərdən keçirməyə başlayıb. İndiyədək Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov namizədliyini müstəqil şəkildə irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib. Dəyişikliklərdən sonra seçkidə iştirak qərarı verən partiyalar öz qərarlarına yenidən müzakirə edə biləcəklərini açıqlayıblar.
Hacılı bildirib ki, Müsavatın seçkidə iştirak qərarı qüvvədədir. Sadəcə olaraq, son dəyişikliklərdən sonra seçkiyə gedib-getməmək məsələsi partiya strukturlarının müzakirəsinə verilib. "Seçkiyə hazırlıq işləri isə, proqrama uyğun şəkildə davam edir. Bizim partiyanın Seçki Qərargahı daimi fəaliyyət göstərən bir qurumdur. Ona görə də biz seçkiyə, demək olar ki, hazırıq. İndi müəyyən texniki məsələlərin həlli ilə məşğuluq. Əsas çətinliyimiz maliyyə məsələsidir. İnanırıq ki, seçkiyə start veriləndən sonra, partiyamızın çoxsaylı təəssübkeşlərinin köməyi ilə fond yarada biləcəyik",- deyə Hacılı bildirib.
Azərbaycan Demokrat Partiyasının (ADP) sədri Sərdar Cəlaloğlu da çərşənbə günü Trend -a bildirib ki, partiya seçkiyə hazırlıqla bağlı işlərini təxirə salmayıb. Artıq ötən həftə ADP-nin Mərkəzi Seçki Qərargahı təsis olunub, 60 rayonda seçki qərargahları formalaşdırılıb. "Biz artıq seçkiyə start vəziyyətindəyik. Şəxsən mən qəti şəkildə seçkidə iştirakın tərəfdarıyam" - deyən Cəlaloğlunun sözlərinə görə, indiki şəraitdə müxalifət radikal addımlardan çəkinməlidir. Belə addımlar atılsa, ölkədə antidemokratik vəziyyət kəskinləşəcək. "Biz çalışmalıyıq ki, problemləri dialoq yolu ilə həll edək və vəziyyət kəskinləşməsin. Çünki müəyyən qüvvələr ölkədə vəziyyətin radikallaşmasından istifadə edə bilər" - deyən Cəlaloğlu onu da bildirib ki, ADP - də yalnız müəyyən bir qrup seçkidə iştirakla bağlı qərara yenidən baxılmasını istəyir. "Mən onları inandıracağam ki, seçkidə iştirak etmək vacibdir",- deyə o əlavə edib.
Seçkiyə müstəqil şəkildə qatılan poitoloq Eldar Namazov da çərşənbə günü Trend -a deyib ki, Seçki Məcəlləsinə dəyişikliklər onun seçkiyə hazırlıqla bağlı işlərini davam etdirməyə hər hansı təsir göstərməyib. Namazov seçkidə iştirakın tərəfdarı olduğunu diqqətə çatdırıb.
Məqalə müəllifi ilə əlaqə ünvanı: [email protected]