Azərbaycan, Bakı, 09 iyun / Trend , müxbir D.Xatınoğlu/ Rəsmi Bağdadın Vaşinqtonla təhlükəsizlik müqaviləsi bağlaması, ABŞ hərbçilərinin İraqda qalması bu ölkədə sabitliyin bərpasında mühüm rol oynaya bilər. "İraq və ABŞ arasında təhlükəsizlik müqaviləsinin bağlanması vacibdir" -deyə, İran politoloqu Əhməd Zeydabadi Trend -a bildirib.
İraqın Baş naziri Nuri Əl-Maliki iyunun 7-də İrana səfər edib. Əl-Maliki İran prezidenti Mahmud Əhmədinejadla görüşündə İraq və ABŞ arasında təhlükəsizlik müqaviləsinin bağlanması barədə müzakirələr aparıb. BBC-nin bazar günü yaydığı məlumata görə, İraqın Baş naziri bu müqavilənin İrana hər hansı bir təhlükə törətməyəcəyini bildirib. İran rəsmiləri ABŞ hərbçilərinin İraqda uzun müddət qalmasının əleyhinə olduqlarını dəfələrlə bəyan ediblər.
"İraq höküməti hələlik ölkədə sabitliyi bərqərar etməyə qadir deyil və ABŞ hərbçilərinin orada qalması rəsmi Bağdad üçün çox vacibdir" - deyə, Zeydabadi bazar ertəsi telefonla Tehrandan bildirib. Onun fikrincə, İran rəsmiləri İraqla ABŞ arasında təhlükəsizlik müqaviləsinin bağlanmasından narahatdırlar. "Lakin, Malikinin Əhmədinejada verdiyi zəmanət də əhəmiyyətlidir. Rəsmi Bağdad bu müqavilənin tərəfdarıdır və ABŞ hərbçilərinin İraq ərazisindən İrana hücum etməyəcəyinə dair zəmanət verməsi onun üçün çox vacibdir" - deyə, İran politoloqu hesab edir. Zeydabadinin fikrincə, İranın narazılığına baxmayaraq, gec-tez İraqla ABŞ arasında təhlükəsizlik müqaviləsi bağlanacaq.
"Əl-Malikinin İran rəsmilərinə müqavilə ilə bağlı zəmanət verməsi, əslində, tam təminat demək deyil. Lakin bu, İranın təhlükəsizliyinin qorunması üçün əhəmiyyətli addım ola bilər" - deyə, digər İran politoloqu Maşallah Şəmsulvaezin (Maşa-Allah Şamsalvaezin) Trend -a bildirib.
Onun fikriincə, ABŞ İraqı işğal edib və hərbi qüvvələri orada Vaşinqtonun maraqlarına uyğun hər hansı bir addım ata bilərlər. " İraqın Baş nazirinin İrana verdiyi vəd Parlamentdə müzakirə olunsa və qanunda əksini tapsa ki, bu müqavilə qonşu ölkələrin təhlükəsizliyinə ziyan vurmayacaq, o zaman bu sənəd ciddi zəmanət kimi qəbul oluna bilər. Əhmədinejad Əl-Maliki ilə görüşündə İraqın müstəqil oldğunu, hakmiyyətinin demokratik və xalqın dəstəyi ilə qurulduğunu vurğulayıb. Bu, onu göstərir ki, İran rəsmi Bağdada güvənir"-deyə, Şəmsəlvaezin hesab edir.
Onun sözlərinə görə, sözügedən müqavilədə İranı təhdid edən hər hansı bir bənd olarsa, rəsmi Tehran bu barədə İraqa xəbərdarlıq edəcək. İraq tərəfi isə, öz növbəsində, çalışacaq ki, bu bəndi müqavilədən çıxarmaq üçün ABŞ-ı razı salsın. Politoloq Əl-Malikinin Tehrana səfərini ikitərəfli müzakirələr aparılması üçün müsbət addım hesab edir.
BMT-nin qərarına əsasən, ABŞ hərbçiləri 2008-ci ilin sonunadək İraqda qalmalıdırlar. İraq və ABŞ çalışır ki, təhlükəsizlik müqaviləsi bağlamaqla, ABŞ hərbçilərinin ölkədə qalmasını uzatsın. İran hakimiyyətində isə, düşünürlər ki, ABŞ İrana hücum etmək üçün İraq torpağından istifadə edə bilər. Buna görə də, rəsmi Tehran dəfələrlə bu müqavilənin bağlanmasının əleyhinə olduğunu bəyan edib. ABŞ və İraq arasında təhlükəsizlik müqaviləsinin bağlanması Amerka hərbçilərinin 10 il müddətində İraqda qalmasına icazə verəcək.
