Azərbaycan, Bakı, 30 iyun/ Trend , müxbir E.Babayev/ Azərbaycanda fəaliyyət göstərən siyasi partiyaların bir neçəsi istisna olmaqla digərlərinin hələ də İnternet saytları yoxdur. Trend -un araşdırmasına görə, hazırda yalnız Vətəndaş Həmrəyliyi (vhp.az) və Yeni Azərbaycan (yap.org.az), Demokratik İslahatlar (demroforms.org) partiyalarının İnternet saytları müntəzəm fəaliyyət göstərir.
Trend -un arayışı: Azərbaycanda 52 siyasi partiya dövlət qeydiyyatına alınıb. Onlardan bir qisminin fəaliyyəti nəzərə çarpmır. Gündəmdə olan və aktiv siyasi fəaliyyətlə məşğul olan partiyaların sayı 20-ə yaxındır.
Müsavat Partiyasının Mərkəzi İcra Aparatının rəhbəri Arif Hacılı Trend -a bildirib ki, partiyanın gündəlik həyatı ilə bağlı məlumatlar Müsavat başqanı İsa Qəmbərin (isagambar.az) saytında yerləşdirilir. Bundan başqa, Qəmbərin təsisiçisi olduğu "Yeni Müsavat" qəzetinin (musavat.com) saytı fəaliyyətdədir. "Bu baxımdan partiyanın xüsusi saytının yaranmasına zərurət duymamışıq. Ancaq prinsipcə belə bir sayt yaradıla bilər", - deyə o vurğulayıb.
Azərbaycan Milli İstiqlal Partiyasının (AMİP) sədr müavini Əli Orucov isə bildirib ki, təşkilatın əvvəllər İnternet saytı olub. Ancaq sonradan həmin sayt fəaliyyətini dayandırıb. "Nəzərdə tuturuq ki, gələcəkdə saytı bərpa edək", - deyə o bildirib.
Azərbaycan Sosial Demokrat Partiyasının (ASDP) təmsilçisi Yaşar Əsədov da bildirib ki, partiyanın İnternet saytı mövcuddur. Ancaq həmin sayt hazırda aktiv deyil. "Partiyanın İnternet saytı çox güman ki, bir müddətdən sonra bərpa olunacaq", - deyə o vurğulayıb.
Ədalət Partiyasının sədr müavini Elxan Şükürlü də bildirib ki, təşkilatın İnternet ünvanı var. Sadəcə olaraq hazırda fəaliyyət göstərmir. Onun sözlərinə görə, sayt müntəzəm informasiya ilə təmin olunmadığından fəaliyyətini dayandırıb.
Azərbaycan Xalq Cəbhəsi Partiyasının (AXCP) sədr müavini Həsən Kərimov isə deyib ki, təşkilatın İnternet saytı mövcuddur. Sadəcə olaraq AXCP artıq bir müddətdir ki, qərargahsız qalıb. Bu səbəbdən də sayt fəaliyyətini dayandırıb.
Azərbaycan Demokrat Partiyasının (ADP) mətbuat xidmətində də bildirilib ki, təşkilatın İnternet saytı hazırda fəaliyyətdə deyil. Partiyadan bunun hansı səbəblərlə bağlı olduğu açıqlanmayıb. Yalnız o qeyd edilib ki, gələcəkdə təşkilatın saytının fəaliyyətə başlaması planlaşdırılır.
Böyük Quruluş, Klassik Xalq Cəbhəsi, Vətəndaş Birliyi, Açıq Cəmiyyət, Liberal partiyalarından da bildirilib ki, bu təşkilatların İnternet saytları fəaliyyət göstərmir.
Məqalə müəllifi ilə əlaqə ünvanı: [email protected]
