Azərbaycan, Bakı, 29 iyul/ Trend , müxbir S.Ağayeva/ Azərbaycan prezidenti İlham Əliyevin İndoneziyaya qarşıdakı rəsmi səfəri zamanı ikitərəfli münasibətlərin perspektivləri müzakirə olunacaq.
Azərbaycanın İndoneziyadakı səfiri İbrahim Hacıyev çərşənbə axşamı Trend -a bildirib ki, iki ölkənin Xarici İşlər nazirliklərində səfərin tarixi razılaşdırılır.
Bu ölkənin xarici işlər naziri Həsən Virayuda mayda Bakıya səfəri zamanı İndoneziya prezidenti Susilo Bambanq Yudoyononun adından onun ölkəsinə səfər etmək barədə dəvəti Azərbaycan prezidentinə təqdim edib.
"İndoneziya tərəfi böyük maraqla Azərbaycan prezidentinin rəsmi səfərini gözləyir. Bu, Azərbaycan prezidentinin bu ölkəyə ilk rəsmi səfəridir", - Hacıyev bildirib.
"İki ölkə arasında müqavilə-hüquq bazasının genişləndirilməsi üzrə iş davam etdirilir, siyasi, iqtisadi, humanitar sahələri əhatə edən 20 layihə nəzərdən keçirilmək üçün İndoneziya tərəfinə təqdim edilib və onların böyük hissəsi Azərbaycan prezidentinin İndoneziyaya səfəri zamanı imzalanacaq", - səfir söyləyib.
Müəlliflə əlaqə saxlamaq üçün elektron ünvan: [email protected]
