Azərbaycan, Bakı, 22 sentyabr / Trend , müxbir İ.Əlizadə/ Beynəlxalq Avropa Hərəkatının Azərbaycandakı nümayəndəliyi ölkədə seçkiqabağı vəziyyətin monitorinqinə başlayıb. Bu barədə bazar ertəsi Beynəlxalq Avropa Hərəkatının Azərbaycandakı nümayəndəliyindən məlumat verilib.
Trend -un arayışı: Azərbaycanda prezident seçkisi oktyabrın 15-də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, hazırki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
Monitorinq prosesi zamanı hərəkatın nümayəndələri seçkidə namizədliyi qeydə alınan namizədlərlə yanaşı, seçkiləri boykot edən müxalifət partiyalarının liderləri, mətbuat nümayəndələri, beynəxalq təşkilatların Azərbaycandakı təmsilçiləri, səfirliklər, habelə Mərkəzi Seçki Komissiyasının nümayəndələri ilə görüşlər keçirəcəklər. Bundan başqa, mütxəlif namizədlərin seçicilərlə görüşlərində iştirak edəcəklər.
Monitorinq seçkiyə 3 gün qalana qədər davam etdiriləcək. Sonda monitorinqin nəticələri Beynəlxalq Avropa Hərəkatının baş katibliyinə, hərəkatın 44 ölkədə fəaliyyət göstərən nümayəndələrinə, Avropa Birliyinə, Avropa Şurasına, Avropa Şurası Parlament Assambleyasına, Avropa Komissiyasına, Avropa Parlamentinə və bir sıra beynəlxalq qurumlara göndəriləcək.
Məqalə müəllifi ilə əlaqə ünvanı: [email protected]