Azərbaycan, Bakı, 03 oktyabr / Trend , müxbir K. Zərbalıyeva/ Azərbaycanda narkotika cinayətlərinə görə məsuliyyətə cəlb olunanlar sırasında əvvəl məhkum olunmuşlar üstünlük təşkil edir.
Bu barədə cümə günü jurnalistlərə açıqlamasında BMT-nin Cənubi Qafqazda Narkotiklərə Nəzarət Proqramının Azərbaycan üzrə koordinatoru Məzahir Əfəndiyev məlumat verib.
Əfəndiyev bildirib ki, bu ilin 8 ayında hüquq - mühafizə orqanları tərəfindən narkotiklərlə bağlı 2035 cinayət faktı qeydə alınıb.
Bu cinayətlərdən 700-ü narkotiklərin satışı, 1000-dən çoxu saxlanılması ilə bağlıdır.
Narkotika cinayətləri törədən şəxslər sırasında gənclər üstünlük təşkil edir və bu göstərici 30 - 40 faizdir.
Qanunsuz dövriyyədən çıxarılan narkotiklərin miqdarının ilbəil artdığını vurğulayan koordinator deyib ki, ötən ilin 8 ayı ilə müqayisədə, cari ilin müvafiq dövründə bu göstərici 1 tondan artıq olub.
Qanunsuz dövriyyədən çıxarılan narkotiklər arasında ağır tərkibli narkotiklərin də çəkisinin artdığını vurğulayan Əfəndiyev bildirib ki, ötən il qanunsuz dövriyyədən 11 kiloqram heroin çıxarılıb.
Müəlliflə əlaqə saxlamaq üçün elektron ünvan- [email protected]