Azərbaycan, Bakı, 08 yanvar / Trend , müxbir A.Hüseynbala/ Azərbaycan müxalifətinin referendumla bağlı birgə təşəbbüs qrupunun yaradılması ideyası baş tutmadı.
"Azadlıq" blokunun təşəbbüs qrupunun yaradılması ilə bağlı yanvarın 7-də müzakirələr aparılıb. Blokun sabah keçirilən iclasında məsələni bir daha müzakirə edib yekun qərar qəbul edəcəyik", - cümə axşamı Trend -a "Azadlıq" blokunda təmsil olunan Milli Birlik Hərəkatının lideri Lalə Şövkət bildirib.
Trend -un arayışı: Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995-ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
Azərbaycanın hakim Yeni Azərbaycan Partiyası "Yeni Azərbaycan", müxalif Müsavat Partiyası "Respublikaçılar" təşəbbüs qrupu yaradıblar.
Müsavat Partiyasının İcra Aparatının rəhbəri Arif Hacılı öncə Trend -a açıqlamasında müxalifətin vahid təşəbbüs qrupunun yaradılmasına ümid etmədiyini deyib.
Onun sözlərinə görə, "Azadlıq" blokunun yaradacağı təşəbbüs qrupunda "Azərbaycan Naminə" İctimai Forumun rəhbəri Eldar Namazov da təmsil olunacaq. Ad məsələsinə gəldikdə, Lalə Şövkət deyib ki, bu məsələ də blokun sabah keçirilən iclasında irəli sürülən təkliflər əsasında müəyyənləşdiriləcək.
Milli Birlik Hərəkatının lideri Müsavat Partiyasının yaratdığı "Respublikaçılar" təşəbbüs qrupuna qoşulmaqla bağlı onlara müraciət edilmədiyini qeyd edib.
"Azadlıq" blokunda təmsil olunan Vətəndaş və İnkişaf Partiyasının (VİP) sədri Əli Əliyev isə cümə axşamı Trend -a bildirib ki, təşəbbüs qrupunda təmsil olunmaq üçün Klassik Xalq Cəbhəsi Partiyasının sədri Mirmahmud Mirəlioğlu və Demokrat Partiyasının sədri Sərdar Cəlaloğlu dəvət edilib.
Azərbaycan Demokrat Partiyası (ADP) referendumla bağlı müxalifətin vahid təşəbbüs qrupunun yaradılmasının tərəfdarıdır.
"Bu barədə təklifi ilk dəfə Milli Demokratiya İnstitutunun rəhbəri Leyla Yunus irəli sürüb. Dekabrın axırında aparılan müzakirələrdə "Azadlıq" blokunda təmsil olunan partiyalarla yanaşı Müsavat Partiyasının da təmsilçisi iştirak edib", - cümə axşamı Trend -a ADP sədri Sərdar Cəlaloğlu bildirib.
Onun sözlərinə görə, həmin toplantıda yanvarın ortalarında vahid təşəbbüs qrupunun yaradılması haqda razılıq əldə olunub.
"Müsavatın qərarından asılı olmayaraq ADP vahid təşəbbüs qrupunun yaradılması prosesində iştirak edəcək", - Cəlaloğlu əlavə edib.
"Demokratiya Uğrunda İttifaq müxalifətin vahid təşəbbüs qrupunun yaradılmasının tərəfdarıdır", - cümə axşamı Trend -a ittifaqda təmsil olunan Klassik Xalq Cəbhəsi (KXCP) sədri Mirmahmud Mirəlioğlu bildirib.
Onun fikrincə, indi bəzi siyasi qurumlar təşəbbüsü öz adlarına çıxmaq üçün çalışır. "Müsavatın Partiyasının və "Azadlıq" blokunun ayrı-ayrı qruplar yaratması, artıq işbirliyinin alınmamasından xəbər verir", - KXCP sədri vurğulayıb.
Mirəlioğlu vahid qurumun yaradılmayacağı halda DUİ-də təmsil olunan patiyaların ayrıca təşəbbüs qrupunun yaradılması məsələsinin gündəmə gələcəyini də istisna etməyib.
Məqalə müəllifi ilə əlaqə ünvanı: [email protected]
