Azərbaycan, Bakı, 10 iyul / Trend , müxbir A.Hüseynbala /
Azərbaycanın bir qrup iqtidaryönlü partiyasının bələdiyyə seçkiləri ilə bağlı blok yaratmaq təşəbbüsü baş tutmayacaq.
"Bizimlə məsləhətləşmələr aparan üç partiya artıq başqa blokda təmsil olunduqları üçün "Demokratik Azərbaycan" blokunu təsis etməyəcəyik", - cümə günü Trend -a Respublikaçılar Partiyasının sədri Sübut Əsədov bildirib.
Trend -un arayışı: Azərbaycanda bələdiyyə seçkiləri 2009-cu ilin payızında, parlament seçkiləri isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan Parlamentində "Bələdiyyələrin birləşdirilməsi haqqında" qanun qəbul edilib.
Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Əsədovun sözlərinə görə, bələdiyyə seçkilərində birlikdə iştirak etmək təşəbbüsünü əvvəlcə hər üç partiya dəstəkləyib. "Biz bu məqsədlə Azad Respublikaçılar, Milli Dövlətçilik və Mübarizlər partiyaları ilə danışıqlar aparırdıq. Lakin son anda həmin partiyalar "Birlik" blokunda təmsil olunmaq haqqında qərar verdilər", - partiya sədri əlavə edib.
Əsədov deyib ki, artıq yeni blok yaratmaq niyyətindən vaz keçiblər. "Bizim təşəbbüsümüzü Demokratik Azərbaycan Dünyası Partiyası indi də dəstəkləyir. Lakin iki partiyanın blok yaratması ciddi effekt verməyəcək. Bu səbəbdən hər iki partiya bələdiyyə seçkilərində təkbaşına iştirak edəcək", - Respublikaçılar Partiyasının rəhbəri vurğulayıb.
Məqalə müəllifi ilə əlaqə ünvanı:[email protected]
