Azərbaycan, Bakı, 03 fevral / Trend , müxbir A.Hüseynbala/
Azərbaycanın müxalifət partiyası parlament seçkilərində siyasi bloklara qoşulmayacaq
"Parlament seçkilərində iştirak etsək də müxalifətin yaradacağı hər hansı bloka qoşulmaq niyyətində deyilik", - çərşənbə günü Trend -a Açıq Cəmiyyət Partiyası (ACP) sədri Vaqif Mahmudov bildirib.
Trend -un arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Mahmudovun sözlərinə görə, seçkilərdə hansı dairələrdən və nə qədər namizəd irəli sürəcəklərini dəqiqləşdirməyiblər.
"Partiyanın deputatlığa namizədləri kifayət qədərdir. Amma partiyadaxili müzakirələr davam etdiyindən üzvlərimizin hansı dairələrdən irəli sürüləcəyini müəyyən etməmişik", - partiya sədri əlavə edib.
ACP sədri deyib ki, bloklara qoşulmasalar da partiyalarla əməkdaşlıq istisna olunmur. "Biz, təbii ki, bütün dairələrdən namizəd irəli sürməyəcəyik. Bundan başqa, ola bilsin ki, digər partiyanın hansısa dairədəki namizədi bizim üzvümüzdən daha şanslı olacaq. Bu halda həm təbliğat kampaniyası, həm də səsvermə prosesində istənilən partiya ilə birgə addımlar ata bilərik", - Mahmudov vurğulayıb.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. 2007-ci ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar. ACP 2008-ci il oktyabrın 15-də keçirilmiş prezident seçkilərində iştirak etməmək barədə qərar qəbul etsə də hаkim Yeni Azərbaycan Partiyasının namizədi İlham Əliyevi dəstəkləyib.
Vaqif Mahmudov 2009-cu ilin sentyabr ayında ACP-nin sədri seçilib. Partiyanın ilk sədri Akif Şahbazov ötən ilin yayında vəzifəsindən istefa verib. Mahmudov partiya rəhbəri seçilənə qədər Ali Məclisin sədri olub.
Məqalə müəllifi ilə əlaqə ünvanı: [email protected]