Azərbaycan, Bakı, 20 iyul /Trend, müxbir D.Xatınoğlu/
İranın Əfqanıstanın təhlükəsizliyi və iqtisadi inkişafında rolu danılmazdır. "Lakin Müttəkinin NATO və ABŞ qüvvələrini Əfqanıstanda qeyri-sabitlik yaratmaqda günahlandırmasını düzgün hesab etmirik və bu məsələ ilə bağlı bizim fikrimiz fərqlidir", - bu barədə Əfqanıstan Prezident Administrasiyasının mətbuat xidmətinin rəhbəri Həmid Elmi Trend-ə deyib.
BBC-nin məlumatına əsasən, bu gün səhər Kabildə Əfqanıstanın iqtisadi və təhlükəsizlik məsələlərini araşdırmaq məqsədi ilə beynəlxalq konfrans öz işinə başlayıb. Konfransda BMT-nin baş katibi Pan Gi Mun, 10-dan artıq ölkənin xarici işlər nazirləri və 60-a yaxın beynəlxalq təşkilatın rəhbərləri iştirak edirlər.
İranın xarici işlər naziri Mənuçöhr Müttəki Kabildə keçirilən beynəlxalq konfransda xarici qüvvələrin Əfqanıstanda olmasını çox kəskin şəkildə tənqid edib. Müttəki konfransda deyib ki, xarici qüvvələrin Əfqanıstanda olması bu ölkənin problemlərinin həllinə kömək etməyib, hələ üstəlik, bəlkə də problemləri daha da artırıb.
İran Əfqanıstanın təhlükəsizliyi ilə bağlı bundan əvvəl Paris və Londonda keçirilən konfranslarda iştirak etməyib.
Həmid Elmi İranın Kabildə keçirilən beynəlxalq konfransda iştirakını müsbət addım kimi dəyərləndirib. "Biz İranın Əfqanıstanla bağlı təkliflərini dinlədik və bu təklifləri diqqətlə araşdıracağıq", - o deyib.
Elminin fikrincə, xarici qüvvələr Əfqanıstan Milli Ordusunun qüvvələri ilə birlikdə həmişə ölkənin təhlükəsizliyinin təmin olunmasında böyük rol oynayıblar. "Əfqanıstan hökuməti terrorizm, Taliban və "əl-Qaidə" ilə mübarizəni təkbaşına apara bilməz, regionda terrorizmi məhv etmək üçün bütün ölkələr Əfqanıstan hökumətinə və xalqına kömək etməlidir", - Əfqanıstan Prezident Administrasiyasının mətbuat xidmətinin rəhbəri Həmid Elmi çərşənbə axşamı Trend-ə telefonla Kabildən bildirib.
Elmi əlavə edib ki, terrorizmlə mübarizə yollarından biri də Əfqanıstanın iqtisadi infrastrukturunun yaxşılaşdırılmasıdır. "Dünya ölkələri, xüsusilə də regionun İran, Çin və Rusiya kimi ölkələrinin yardımları ilə Əfqanıstanın iqtisadiyyatını çiçəkləndirmək olar", - Elmi deyib.
Əfqanıstan Prezident Administrasiyasının mətbuat xidməit rəhbərinin fikrincə, Əfqanıstan öz coğrafi mövqeyinə görə region ölkələri üçün tranzit ölkə ola bilər. "Region ölkələri Əfqanıstanda magistral yollar tikmək, ticarət, yükdaşımaları və yolların təhlükəsizliyini təmin etməklə bu ölkənin inkişafına kömək edə bilərlər", - Elmi deyib.
