...

Azərbaycanın müxalif partiyaları parlament idarəçiliyində iştirak etmək iddiasındadır

Siyasət Materials 27 Noyabr 2010 12:31 (UTC +04:00)
Azərbaycanın müxalif Böyük Quruluş Partiyası (BQP) hakim Yeni Azərbaycan Partiyasının (YAP) əməkdaşlıq təklifinə münasibət bildirib.

Azərbaycan, Bakı, 27 noyabr /Trend, müxbir T.Hacıyev/

Azərbaycanın müxalif Böyük Quruluş Partiyası (BQP) hakim Yeni Azərbaycan Partiyasının (YAP) əməkdaşlıq təklifinə münasibət bildirib.

"Birinci əməkdaşlıq addımı müxalifətin parlament idarəçiliyində təmsil olunmasından başlamalıdır. Əgər bu olmayacaqsa, hakim partiya ilə sonrakı əməkdaşlığın səmərəsi böyük olmayacaq", - bu barədə şənbə günü Trend-ə BQP sədri Fazil Mustafa bildirib.

Bundan öncə hakim Yeni Azərbaycan Partiyasının icra katibinin müavini Siyavuş Novruzov Trend-ə açıqlamasında bildirmişdi ki, hakim partiya istənilən mövzu ətrafında parlamentdə təmsil olunan müxalifətlə əməkdaşlıq etməyə, müzakirələr aparmağa hazırdır.

Noyabrın 7-d keçirilən parlament seçkilərinin nəticəsi olaraq YAP Milli Məclisdə 71 yer qazanıb. Bundan əlavə, Ana Vətən Partiyası (AVP) 2, Vətəndaş Həmrəyliyi Partiyası (VHP) 2, Demokratik İslahatlar Partiyası (DİP), Böyük Quruluş Partiyası (BQP), Ümid, Sosial Rifah Partiyası (SRP), Vətəndaş Birliyi Partiyası (VBP), Ədalət Partiyası, Milli Dirçəliş Hərəkatı Partiyası (MDHP) və Bütöv Azərbaycan Xalq Cəbhəsi Partiyasının (BAXCP) hərəsi 1 deputatla Milli Məclisdə təmsil olunacaq.

Mustafa bildirib ki, əməkdaşlığın əsası müxalifətin parlament idarəçiliyində müəyyən iştiraka cəlb olunması ilə qoyula bilər.

"Parlamentdə hakim partiya çoxluğa malikdir. Təbii ki, səsvermə ilə müxalifət hər hansı mövqe tuta bilməz, çünki say azdır. Belə bir vəziyyətdə əməkdaşlığın birinci yolu bundan keçir ki, parlament idarəetməsində müxalifətin də başqa demokratik ölkələrdə olduğu kimi fəaliyyət imkanı tanınsın. Əgər bu tanınmayacaqsa, sonrakı əməkdaşlıq ancaq daha böyük gücə sahib olan partiya ilə heç bir imkana sahib olmayan bir müxalifət arasında olan, çox da səmərəli olmayan bir münasibətin qurulması ola bilər", - Mustafa əlavə edib.

BQP sədri bildirib ki, bu gün parlamentdə təmsil olunan müxalifət partiyaları dialoqa açıq, cəmiyyət həyatında müəyyən dərəcədə siyasi münasibətlərin sivil formada həllinə maraq göstərən anlayışa sahibdirlər.

"Əgər bu anlayış hakim partiya tərəfindən də normal qəbul olunsa, məncə problem olmayacaq. Əks halda əməkdaşlığın perspektivi heç də ürəkaçan olmayacaq", - o vurğulayıb.

Xəbər lenti

Xəbər lenti