Azərbaycan, Bakı, 22 dekabr /Trend, müxbir K.Nemət/
Fələstinin hakim "Fəth" təşkilatının Ramallahdakı qərargahının mətbuat katibi Məhəmməd Udvan İsrailin Qəzza sektoruna hücumunun və yeni müharibənin başlanmasının mümkünlüyünü istisna etmir.
"Gec və ya tez İsrail yenidən Qəzza sektoruna hücum edəcək və regionda yeni irimiqyaslı müharibə başlayacaq", - Udvan Ramallahdan telefonla Trend-ə bildirib.
Həftə ərzində İsrail HHQ Qəzza sektoruna bir neçə hava hücumları edib və nəticədə HƏMAS islam müqavimət hərəkatının beş üzvü öldürülüb. Öz növbəsində Fələstinin müqavimət qüvvələri minaatanlardan cavab atəşi açıblar. Bu barədə "əl-Cəzirə" telekanalı məlumat verib.
Udvanın sözlərinə görə, Qəzza sektorunda dinc fələstinlilərin həlak olmasından qaçmaq üçün administrasiyanın rəhbərliyi Misirə ümid edir.
"Regiondakı yeni müharibə Fələstin tərəfindən ciddi itkilərə gətirib çıxaracaq, dinc əhali arasında itkilərdən qaçmaq üçün biz Misir tərəfindən Rəfah buraxılış məntəqəsinin açılacağına ümid edirik", - Udvan bildirib.
2008-ci il dekabrın sonlarında İsrail ordusunun keçirdiyi "Əridilmiş qurğuşun" adlı əməliyyat nəticəsində Fələstin anklavının 1,4 min sakini və 13 israilli həlak olub.