Azərbaycan, Bakı, 18 yanvar /Trend, müxbir E.Tariverdiyeva/
Yaxın yarım ildə Ermənistan-Türkiyə münasibətlərinin normallaşdırılması prosesində rəsmi səviyyədə irəliləyişin əldə olunacağını gözləməyə dəyməz. International Crisis Group-un Avropa proqramları direktoru Sabina Freyzer (Sabine Freizer) bu fikirdədir.
"Bu prosesdə irəliləyişin olmaması, həm də onunla bağlıdır ki, Türkiyədə parlament seçkiləri iyuna təyin olunub və hökumət türk millətçi partiyaların Ermənistanla münasibətlərin normallaşdırılması məsələsində fəal müqavimət göstərməsini istəmir", - Freyzer elektron poçtla Trend-ə bildirib.
Ermənistanın xarici işlər naziri Edvard Nalbandyan 2010-cu ildə Ermənistanın xarici siyasətinə yekun vurarkən bəyan edib ki, Ermənistan öz tərəfindən addımlar atıb və indi növbə Türkiyənindir. "Rəsmi Yerevan qarşısında 2011-ci ildə Ermənistan-Türkiyə münasibətləri sahəsində siyasəti dəyişmək tapşırığı durmur. Əgər mövqeyini dəyişməli olan varsa, o da Türkiyədir. Bu ölkə Ermənistan-Türkiyə məsələsində özünün ilkin şərt taktikasını dəyişməlidir", - Ermənistanın xarici işlər naziri bildirib.
2009-cu il oktyabrın 10-da Sürixdə Türkiyə və Ermənistanın xarici işlər nazirləri Əhməd Davudoğlu və Edvard Nalbandyan tərəfindən diplomatik münasibətlərin yaxşılaşdırılmasına dair protokollar imzalanıb. Lakin protokollar hələ də hər iki ölkənin parlamentində ratifikasiya olunmayıb.
1993-cü ildə münasibətlərin pozulmasına və Türkiyə-Ermənistan sərhədlərinin bağlanmasına səbəb Yerevanın dünyada "erməni soyqırımı"nı tanıtmaq cəhdləri və Ermənistan Silahlı Qüvvələrinin Azərbaycan ərazilərini işğal etməsi olub.
Freyzerin fikrincə, Ermənistan Türkiyə ilə münasibətləri yoluna qoymağa hazır deyil.
"Prezident Serj Sarkisyanın və onun administrasiyasının onlara sərt xətt tərəfdarlarının göstərdikləri təzyiqlərlə əlaqədar Türkiyə hökumətilə yaxınlaşma axtarması çətin olan Ermənistanda da vəziyyət eynidir", - ekspert bildirib.
Freyzerin sözlərinə görə, bununla yanaşı türk və erməni vətəndaş cəmiyyətləri, işgüzar dairələr, jurnalistlər və gənclərin nümayəndələri arasında əlaqələr davam edir.
"Baxmayaraq ki, Türkiyə Azərbaycanla həmrəylik əlaməti olaraq və Azərbaycan topraqlarının işğalı ilə bağlı Ermənistanla sərhədləri bağlı saxlamağı davam etdirir, Türkiyə və Ermənistanın adi nümayəndələri arasında əlaqələr azalmamalıdır. Ermənilərlə türklər arasında münasibətlərin yaxşılaşması regionda sülhün və sabitliyin saxlanmasına müsbət təsir edə bilər", - Freyzer bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Materialın hazırlanmasında A.Axundov iştirak edib.