Azərbaycan, Bakı, 18 may /Trend, müxbir M.Əliyev/
Azərbaycanla Avropa İttifaqı arasında viza rejiminin sadələşdirilməsi üzrə danışıqlar yaxın həftələrdə başlayacaq. Trend-in məlumatına görə, bu barədə jurnalistlərə Avropa İttifaqının Azərbaycandakı nümayəndə heyətinin rəhbəri Rolan Kobia çərşənbə günü Bakıda başlayan "Şərq tərəfdaşlığı iki ildən sonra: uğurlar və çətinliklər" beynəlxalq konfransında məlumat verib.
"İndi biz mandatın verilməsini gözləyirik. Əgər hər iki tərəfin siyasi iradəsi olarsa, onda bu proses tez başa çatacaq", - Kobia bildirib.
Kobianın sözlərinə görə, bu məsələdə müsbət nümunə Gürcüstandır.
"Biz Avropa ilə Azərbaycan arasında əhalinin gediş-gəlişinin sadələşdirilməsini arzu edirik və bunun üçün hər iki tərəfin səyləri vacibdir", - Kobia deyib.